ԱԲ-ը կարող է արագացնել սրտի հիվանդությունների բուժման մեթոդների որոնումները․ հետազոտություն

Նոր հետազոտության համաձայն՝ արհեստական բանականության (ԱԲ) նոր գործիքը կարող է արագացնել սրտի հիվանդությունների բուժման մեթոդների որոնումը:

Սիրտ-անոթային հիվանդությունները (ՍԱՀ) մահացության և հաշմանդամության հիմնական պատճառն են Եվրոպական միությունում։ Տնտեսական համագործակցության և զարգացման կազմակերպության (ՏՀԶԿ) տվյալներով՝ դրանք տարեկան հանգեցնում են մոտ 1,7 միլիոն մահվան և ախտահարում 62 միլիոն մարդու:

Ինչպես հաղորդում է Euronews-ը, Լոնդոնի Կայսերական քոլեջի գիտնականները մշակել են ԱԲ գործիք, որն օգնում է պարզել, թե որ գեներն են կապված հիվանդությունների հետ և արագացնում է սրտի հիվանդությունների դեմ դեղամիջոցների որոնումը՝ համադրելով սրտի մանրակրկիտ պատկերները բժշկական խոշոր տվյալների բազաների հետ:

CardioKG կոչվող գործիքը ստեղծվել է UK Biobank-ի հազարավոր մարդկանց սրտի վիզուալիզացիայի տվյալների հիման վրա: Հետազոտության մեջ ընդգրկվել են ինչպես առողջ կամավորներ, այնպես էլ այնպիսի վիճակներ ունեցող պացիենտներ, ինչպիսիք են նախասրտերի ֆիբրիլյացիան, սրտային անբավարարությունը և միոկարդի ինֆարկտը:

Ըստ հետազոտողների՝ սա թույլ է տալիս ավելի ճշգրիտ կանխատեսել, թե որ դեղամիջոցները կարող են օգնել կոնկրետ սրտային հիվանդություններ ունեցող մարդկանց:

«Գիտելիքների գրաֆների առավելություններից մեկն այն է, որ դրանք միավորում են տեղեկատվությունը գեների, դեղամիջոցների և հիվանդությունների մասին»,- նշել է Լոնդոնի Կայսերական քոլեջի MRC Բժշկական գիտությունների լաբորատորիայի սրտի հաշվողական վիզուալիզացիայի խմբի ղեկավար Դեկլան Օ'Ռիգանը:

Հետազոտողների պնդմամբ՝ այս մոտեցումը ժամանակի ընթացքում կարող է հանգեցնել ավելի անհատականացված բժշկական օգնության, երբ բուժումն ավելի լավ է համապատասխանում կոնկրետ մարդու սրտի գործունեության առանձնահատկություններին:

Նույն տեխնոլոգիան կարելի է հարմարեցնել նաև այլ վիճակների ուսումնասիրման համար՝ օգտագործելով բժշկական վիզուալիզացիայի մեթոդները, ներառյալ ուղեղի հիվանդությունները և ճարպակալումը:

«Սա նշանակում է, որ բուժման նոր մեթոդների հայտնաբերման հնարավորություններն ավելանում են: Մենք պարզել ենք, որ սրտի վիզուալիզացիայի ներառումը գրաֆի մեջ էապես բարելավել է նոր գեների և դեղամիջոցների հայտնաբերումը»,- ասել է Օ'Ռիգանը:

Առանձնացված դեղամիջոցների թվում են եղել մեթոտրեքսատը, որը լայնորեն կիրառվում է ռևմատոիդ արթրիտի բուժման համար, ինչպես նաև հակաշաքարախտային միջոցների մի խումբ, որոնք հայտնի են որպես գլիպտիններ:

Արհեստական բանականության մոդելը ենթադրում է, որ մեթոտրեքսատը կարող է օգնել սրտային անբավարարություն ունեցող մարդկանց, իսկ գլիպտինները կարող են օգտակար լինել նախասրտերի ֆիբրիլյացիայով տառապող պացիենտներին:

Վերլուծությունը նաև մատնանշել է կոֆեինի հնարավոր պաշտպանիչ ազդեցությունը նախասրտերի ֆիբրիլյացիա ունեցող որոշ պացիենտների մոտ, սակայն հետազոտողները ընդգծում են, որ դա չի նշանակում, թե մարդիկ պետք է փոխեն կոֆեինի օգտագործման իրենց սովորույթները։

«Հիմնվելով այս աշխատանքի վրա՝ մենք գիտելիքների գրաֆը կվերածենք դինամիկ, դեպի պացիենտը կողմնորոշված համակարգի, որն արտացոլում է հիվանդությունների զարգացման իրական հետագծերը»,- ասել է հետազոտության առաջին հեղինակ, Լոնդոնի Կայսերական քոլեջի տվյալագիտության ոլորտի հետազոտող Խալեդ Ռջուբը:

«Սա նոր հնարավորություններ կբացի անհատականացված բուժման և հիվանդությունների զարգացման հավանական ժամկետների կանխատեսման համար»։