Հայաստանի խորհրդարանում ընդդիմություն գոյություն չունի․ խոսնակ

Խորհրդարանում ընդդիմություն չկա, Հայաստանի խորհրդարանում ընդդիմություն գոյություն չունի, բայց կան որոշակի անձինք, որոնք իրենց տեղերն են փնտրում այլ քաղաքական ուժերի շարքերում՝ հաջորդ գումարման Ազգային ժողովում հայտնվելու համար, նրանց ոչ ոք չի լսում, նրանք փողոցում յոթ հոգի անգամ չեն կարող հավաքել։ Այս մասին սեպտեմբերի 11-ին լրագրողների հետ զրույցում հայտարարել է Հայաստանի խորհրդարանի խոսնակ Ալեն Սիմոնյանը։

Նա վստահություն է հայտնել, որ փողոցում իր լուսանկարի շուրջ ավելի շատ մարդիկ կհավաքվեն, քան «նրանց» (խորհրդարանական ընդդիմության – խմբ.) շուրջ։ «Նրանք քաղաքական դիակներ են, սնանկացածներ և նրանք ասելիք չունեն, նրանք օրակարգ չունեն։ Եթե ձեր միակ օրակարգն այն է, որ ասեք, որ կառավարության օրակարգը օրակարգ չէ, ապա դա օրակարգ չէ։ Եթե մեր օրակարգը սխալ է, ապա ի՞նչ օրակարգ ունեն նրանք։ Հայաստանում խաղաղության օրակարգից բացի այլ օրակարգ չկա», - հավելել է Սիմոնյանը։

Նրա խոսքով՝ չորս տարվա ընթացքում խորհրդարանական ընդդիմությունը ոչ մի անգամ արտահերթ ընտրություններ անցկացնելու պահանջ չի ներկայացրել։ «Ե՞րբ եք տեսել, որ այսպես կոչված ընդդիմությունը պատրաստ լիներ պատասխանատվություն վերցնելու։ Սկզբում բերեցին Վազգեն Մանուկյանին, իսկ հետո Բագրատ Գալստանյանին, որն առհասարակ Կանադայի քաղաքացի է»,- ընդգծել է խորհրդարանի խոսնակը։

Միևնույն ժամանակ, նրա համոզմամբ, արտախորհրդարանական ընդդիմություն գոյություն ունի։ Սիմոնյանը հույս է հայտնել, որ այդ ուժերի մեծ մասը առաջիկա ընտրությունների արդյունքներով կհայտնվի Ազգային ժողովում։ «Խորհրդարանից դուրս կան կայացած ընդդիմադիր քաղաքական գործիչներ, ովքեր, հուսով եմ, կհայտնվեն խորհրդարանում և ԱԺ-ում վերջապես ընդդիմություն կլինի», - նշել է նա։

Սիմոնյանը վստահեցրել է, որ գործարար Սամվել Կարապետյանի կողմից ձևավորվող քաղաքական ուժը իշխանության համար լուրջ մրցակից չէ։ «Այնտեղ քաղաքական ուժ չկա։ Դա շոու է։ Կա հարուստ մարդ, որը հայտնվել է բանտում։ Փորձում են քաղաքական ապաստան գտնել խորհրդարանում, ինչպես դա տեղի է ունեցել տասնամյակների ընթացքում»,- եզրափակել է նա։