Քենեդի կրտսերը նշանակվել է ԱՄՆ առողջապահության նախարար. նա հանդիսավոր երդվել է
ԱՄՆ Սենատը Ռոբերտ Քենեդի կրտսերին հաստատել է ԱՄՆ առողջապահության նախարարի պաշտոնում: Հինգշաբթի օրը ԱՄՆ Գերագույն դատարանի դատավոր Նիլ Գորսուչի գլխավորությամբ տեղի է ունեցել նրա երդման արարողությունը, որը հեռարձակվել է կենտրոնական հեռուստաալիքներով:
Արարողությունը տեղի է ունեցել Սպիտակ տան Օվալաձեւ աշխատասենյակում՝ ԱՄՆ նախագահ Դոնալդ Թրամփի ներկայությամբ։ Ամերիկացի առաջնորդը վստահեցրել է, որ Քենեդի կրտսերը «երեխաների առողջության, խոսքի ազատության, ժողովրդավարության և խաղաղության եռանդուն պաշտպան է»։ «Նա միանգամայն հավատարիմ է վտանգավոր քիմիական նյութերը շրջակա միջավայրից և մեր սննդի մատակարարումից հեռու պահելուն»,- ասել է Թրամփը։ «ԱՄՆ-ն ավելի շատ գումար է ծախսում առողջապահության վրա, քան ցանկացած այլ երկիր, բայց մենք տարեցտարի ավելի ենք հիվանդանում»,- հավելել է նա՝ ընդգծելով, որ նոր նախարարը պետք է շտկի այս իրավիճակը։
Քենեդի կրտսերն իր ելույթում ողջունել է ԱՄՆ Միջազգային զարգացման գործակալության (USAID) աշխատանքը փաստացի դադարեցնելու Թրամփի որոշումը։ Նա նաև ընդգծել է, որ գործակալությունը «գրավվել է ռազմարդյունաբերական համալիրի կողմից» և «դարձել ամբողջ աշխարհում տոտալիտարիզմի և պատերազմի չարաբաստիկ մատակարար»։ Քենեդին նաև նշել է, որ ԱՄՆ-ում ռազմարդյունաբերական համալիրի ազդեցության զգալի աճ է գրանցվել։
Հինգշաբթի օրը Սենատը հաստատել է Քենեդի կրտսերին այդ պաշտոնում: Նրա թեկնածության օգտին քվեարկել է 52 սենատոր, դեմ՝ 48։ 71-ամյա Քենեդի կրտսերը ԱՄՆ 35-րդ նախագահ Ջոն Քենեդիի եղբոր որդին է։ Անցած նախագահական ընտրությունների ժամանակ Դեմոկրատական կուսակցության նախկին անդամ Քենեդի կրտսերը առաջադրվել է որպես անկախ թեկնածու։ Ավելի ուշ նա որոշել է աջակցել հանրապետական Թրամփին՝ վկայակոչելով նմանատիպ դիրքորոշումները առանցքային հարցերի, այդ թվում՝ խոսքի ազատության և տնտեսական անկախության անհրաժեշտության վերաբերյալ:
