Գենետիկան կարող է բացատրել միգրենի զարգացման ռիսկի մինչև 60%-ը․ BBC News
- Ani
- 28 minutes ago
- 1 min read
Միգրենը շատ դեպքերում փոխանցվում է ժառանգաբար. գենետիկական գործոնները կարող են բացատրել այս հիվանդության զարգացման ռիսկի մինչև 60%-ը: Այս մասին BBC News-ին հայտնել է Ավստրալիայի Քվինսլենդի տեխնոլոգիական համալսարանի (QUT) գենետիկ Դեյլ Նայհոլտը:
Նրա խոսքով՝ երկվորյակների հետազոտությունները ցույց են տալիս միգրենի արտահայտված ժառանգական բաղադրիչը: Եթե դրանով տառապել են ծնողները, տատիկները կամ պապիկները, ապա այս նյարդաբանական խանգարմանը բախվելու հավանականությունը զգալիորեն մեծանում է:
«Ընդհանուր առմամբ, ժառանգված գեները պայմանավորում են միգրեն ունեցող մարդկանց մոտ 30–60%-ի վիճակը, մինչդեռ ռիսկի մնացած մասը ձևավորում են արտաքին գործոնները՝ ապրելակերպը, շրջակա միջավայրը և անհատական կենսագրական անամնեզը», - եզրափակել է գիտնականը:
2022 թվականին QUT-ի թիմը վերլուծել է միգրեն ունեցող շուրջ 100 հազար պացիենտների գենետիկական տվյալները և դրանք համեմատել այս ախտորոշումը չունեցող 770 հազար մարդկանց ԴՆԹ-ների հետ: Արդյունքում հայտնաբերվել են այսպես կոչված 123 «ռիսկի հատվածներ»՝ գենետիկական կոդի փոքր վարիացիաներ, որոնք վիճակագրորեն կապված են միգրենի հետ:
Այժմ հետազոտողները իրականացնում են ավելի լայնածավալ վերլուծություն՝ 300 հազար պացիենտների մասնակցությամբ և ակնկալում են, որ նման գենետիկական մարկերները կարող են զգալիորեն շատ լինել. հնարավոր է՝ խոսքը հազարավորների մասին է:
Արդեն իսկ ստացված տվյալները ցույց են տալիս, որ միգրենի հետ կապված գենետիկական տարբերակների մի մասը համընկնում է դեպրեսիայի և դիաբետի մարկերների հետ, ինչպես նաև կոռելյացիայի մեջ է ուղեղի առանձին կառուցվածքների չափսերի հետ: Ըստ Նայհոլտի՝ գեների նույն կլաստերները տարբեր մարդկանց մոտ կարող են դրսևորվել տարբեր կերպ՝ հանգեցնելով տարբեր հիվանդությունների:
Միևնույն ժամանակ գիտնականն ընդգծում է, որ չնայած գենետիկական կապերի որոնման հարցում գրանցված հաջողություններին, կոնկրետ գեները, որոնք հնարավոր կլիներ ուղղակիորեն որպես թիրախ օգտագործել միգրենի նոր դեղամիջոցների համար, դեռևս չեն նույնականացվել:
