Լրագրող Հակոբ Կարապետյանի նկատմամբ բռնության դեպքի առթիվ նախաձեռնվել է քրվարույթ. կա ձերբակալված

Լրագրող Հակոբ Կարապետյանի նկատմամբ բռնություն կիրառելու դեպքի առթիվ նախաձեռնվել է քրեական վարույթ Քրեական օրենսգրքի 195-րդ հոդվածի (Ֆիզիկական ներգործությունը) 1-ին հատկանիշներով: Այս մասին NEWS.am-ին հայտնեցին Գլխավոր դատախազությունից:

Այս առնչությամբ ՆԳՆ–ից էլ հայտնեցին, որ սեպտեմբերի 12-ին քաղաքացուց ՆԳՆ ոստիկանություն ահազանգ է ստացվել՝ դիմակավորված անձի կողմից ծեծի ենթարկվելու վերաբերյալ։ Կազմված փաստաթղթերն ուղարկվել են Քննչական կոմիտե։

«Սեպտեմբերի 15-ին Համայնքային ոստիկանության Կենտրոնական բաժնի ծառայողների միջոցառումների շնորհիվ ձերբակալվել է միջադեպի մասնակիցներից մեկը, որը ներկայացվել է նախաքննական մարմին։ Հայտնաբերվել և պահպանվող հատուկ տարածք է տեղափոխվել նաև դիմակավորված անձին դեպքի վայր հասցրած մեքենան»,- տեղեկացրեցին ՆԳՆ-ից:

Մեր տեղեկություններով ձերբակալվածը տաքսու վարորդն է։

Ավելի վաղ հայտնի էր դարձել, որ Երևանի նախկին քաղաքապետ Հայկ Մարությանի խոսնակ Հակոբ Կարապետյանը ֆեյսբուքյան գրառմամբ տեղեկացրել էր, որ  Երևանի քաղաքապետարանի Հասարակական կարգի ծառայության պետի ժամանակավոր պաշտոնակատար Ավետիք Բաբայանը իր ֆեյսբույքան գրառման համար նախ սպառնացել է իրեն, հայհոյել, ապա դիմակավորված ծեծի է ենթարկել: