Կուբան պատրաստվում է ԱՄՆ-ի հնարավոր ռшզմական գործողությանը. ՄԱԿ-ում Կուբայի մշտական ներկայացուցիչ
Կուբան լրջորեն է ընդունում կղզու դեմ ԱՄՆ-ի հնարավոր ռազմական գործողության սպառնալիքը և կանոնավոր կերպով իրականացնում է բնակչության պատրաստությունը երկրի պաշտպանության համար։ Այս մասին հայտարարել է ՄԱԿ-ում Կուբայի մշտական ներկայացուցիչ Էրնեստո Սոբերոն Գուսմանը, հաղորդում է ՏԱՍՍ-ը:
«Մենք դրան շատ լուրջ ենք վերաբերվում։ Այդ պատճառով, օրինակ, Կուբայում յուրաքանչյուր ուրբաթ օրը նվիրում ենք պաշտպանությանը, որպեսզի ողջ ժողովրդին պատրաստենք մեր ինքնիշխանության, անկախության և տարածքային ամբողջականության պաշտպանությանը։ Մենք պետք է պատրաստ լինենք ցանկացած սցենարի, ներառյալ ռազմականը», - ասել է դիվանագետը։
Սոբերոն Գուսմանի խոսքով՝ Կուբայի ղեկավարությունը հաշվի է առնում ամերիկացի բարձրաստիճան պաշտոնյաների հրապարակային հայտարարությունները, որոնք թույլատրում էին կղզու դեմ ուժային գործողությունների հնարավորությունը։ Դիվանագետը նշել է, որ սպառնալիքները գնահատելիս Հավանան հաշվի է առնում նաև Վաշինգտոնի գործողությունները միջազգային ասպարեզում վերջին տարիներին։
«ԱՄՆ-ի ներկայիս վարչակազմի օրոք նրա բարձրագույն ղեկավարների կողմից հնչել է ոչ թե մեկ կամ երկու, այլ բազմաթիվ հրապարակային հայտարարություններ՝ Կուբան զավթելու, ռմբակոծելու և ոչնչացնելու պատրաստակամության մասին։ Սա ևս մեկ կարևոր պատճառ է նման սպառնալիքներին լուրջ վերաբերվելու համար», - ընդգծել է նա։
Մշտական ներկայացուցիչը նշել է, որ երկու երկրների հնարավորությունները ռազմական ոլորտում անհամադրելի են, փոխարենը Կուբան ստիպված է հենվել պետության պաշտպանության համար սեփական բնակչության պատրաստության վրա։ Միևնույն ժամանակ նա ընդգծել է, որ առճակատումը Հավանայի նպատակը չէ։
Կուբայի իշխանությունները շահագրգռված են առաջին հերթին ԱՄՆ-ի հետ հարաբերությունների կարգավորմամբ և փոխադարձ հարգանքի հիման վրա երկխոսության զարգացմամբ՝ չնայած գոյություն ունեցող քաղաքական տարաձայնություններին։
