Լարվածություն Ադրբեջանի և Թուրքիայի միջև․ Բաքուն կոշտ նախազգուշացում է հղել Էրդողանի թիմին
Ադրբեջանի իշխող «Նոր Ադրբեջան» կուսակցությունը կոշտ հայտարարությամբ է հանդես եկել՝ արձագանքելով Թուրքիայի նախագահի գլխավոր խորհրդական Օքթայ Սարալի և իշխող «Արդարություն և զարգացում» կուսակցության պատգամավորների հայտարարություններին։
Կուսակցությունը հայտարարել է, որ թուրքական լրատվամիջոցներում, այդ թվում՝ իշխանություններին մոտ կանգնած լրատվամիջոցներում, պարբերաբար կեղծ և զրպարտչական տեղեկություններ են տարածվում Ադրբեջանի մասին։ Առանձնակի վրդովմունք է առաջացրել այն հանգամանքը, որ այդ արշավին մասնակցում են Թուրքիայի իշխանության բարձրաստիճան ներկայացուցիչներ։
Կուսակցությունը մերժել է Իսրայելի հետ հարաբերությունների պատճառով Բաքվի հասցեին հնչեցված մեղադրանքները՝ հիշեցնելով Պաղեստինին հետևողականորեն աջակցելու, մարդասիրական օգնություն տրամադրելու և երկու պետությունների սկզբունքին հավատարիմ մնալու մասին, որի համաձայն՝ Պաղեստինի մայրաքաղաքը պետք է լինի Արևելյան Երուսաղեմը։
Կուսակցությունն ընդգծել է, որ Ադրբեջանը, ինչպես և Թուրքիան, աշխարհիկ պետություն է, իսկ դպրոցական համազգեստի և կրոնական հագուստի հետ կապված հարցերը վերաբերում են նրա ներքին քաղաքականությանը։
«Ոչ մի պետություն իրավունք չունի իր կամքը թելադրելու այլ մահմեդական ժողովուրդներին, միջամտելու նրանց ներքին գործերին կամ իրեն մյուսներից վեր դասելու», - ասվում է հայտարարության մեջ։
Կուսակցությունը նաև դատապարտել է նախագահ Իլհամ Ալիևի հասցեին հնչեցված վիրավորանքները և հիշեցրել, որ «Մեկ ազգ՝ երկու պետություն» սկզբունքը ենթադրում է երկու անկախ պետությունների գոյություն, այլ ոչ թե մեկի իրավունքը՝ միջամտելու մյուսի գործերին։
«Նոր Ադրբեջան» կուսակցությունը Թուրքիայի իշխող կուսակցությանը կոչ է արել հրաժարվել նման քաղաքականությունից, հարգել Ադրբեջանի ինքնիշխանությունը և զերծ մնալ այնպիսի գործողություններից, որոնք կարող են վնաս հասցնել Բաքվի և Անկարայի հարաբերություններին։
