Netflix-ի նոր ռոմանտիկ ֆիլմը քննադատության է արժանացել ուսանողուհու և պրոֆեսորի սիրո մասին սյուժեի համար

«Իմ օքսֆորդյան տարին» ռոմանտիկ կատակերգության պրեմիերան Netflix-ում օգոստոսի 1-ին խառը արձագանք է առաջացրել հեռուստադիտողների և քննադատների շրջանում։ Ֆիլմում նկարահանվել են Սոֆիա Քարսոնը և Քորի Միլքրիստը՝ դերասան, որը հայտնի է դարձել «Շառլոթ թագուհի» սերիալից։ Ֆիլմը հիմնված է Ջուլիա Ուիլանի համանուն վեպի վրա, գրում է Daily Mail-ը։

Սյուժեն պատմում է Աննայի՝ հավակնոտ երիտասարդ ամերիկուհու մասին, որը մեկնում է Օքսֆորդ՝ իր երազանքն իրականացնելու համար։ Ամեն ինչ փոխվում է, երբ նա հանդիպում է հմայիչ և խելացի տեղացու, ինչը նրանց կյանքը ամբողջությամբ շրջում է գլխիվայր։ Սակայն այս «խելացի տեղացին» պարզվում է, որ նրա պրոֆեսորն է, ինչը բուռն քննարկումներ է առաջացրել։

Օքսֆորդի համալսարանի դոկտորանտ Քեյլին Գրեյս Էփլը տեսաերիզ է ձայնագրել՝ կոչ անելով «դադարեցնել ուսանող-դասախոս հարաբերությունների ռոմանտիկացումը» և ասել է, որ բոյկոտում է ֆիլմը։ Նա կիսվել է պրոֆեսորի կողմից սեռական ոտնձգությունների ենթարկվելու իր փորձով և ընդգծել նման հարաբերությունները որպես ռոմանտիկ ներկայացնելու վտանգները։

«Երբ վեպը լույս տեսավ 2017 թվականին, դասախոսների և ուսանողների միջև հարաբերությունները դեռևս արգելված չէին, բայց մեր ակտիվիզմի շնորհիվ դա փոխվել է», - բացատրեց Քեյլինը: Նա նաև կենտրոնացավ համաձայնության հարցի վրա. նույնիսկ եթե ուսանողը սկզբում համաձայնվում է հարաբերություններին, եթե նա հրաժարվում է, դասախոսը, որը պատասխանատու է ուսանողի գնահատականների և ապագայի համար, զգալի իշխանություն ունի և կարող է ազդել նրանց ճակատագրի վրա: «Ես անձամբ բողոք եմ ներկայացրել սեռական ոտնձգությունների մասին, և իմ գործը բավարարվել է: Այսպիսով, երբ ես տեսնում եմ այս հարաբերությունները ռոմանտիկացված գրքերում և ֆիլմերում, դա իսկապես անհանգստացնում է ինձ ուսանողների հնարավոր շահագործման պատճառով», - ասաց նա: