«ՀՐԱՊԱՐԱԿ». ԳՆԱՑԵԼ ԵՆ ԶՈՐԱՄԱՍԵՐ, ԲԱՅՑ ԶԻՆԾԱՌԱՅՈՂՆԵՐԻ ՀԵՏ ՉԵՆ ՇՓՎԵԼ

ԵՊՀ պատվիրակությունը` պաշտպանության նախարար Սուրեն Պապիկյանի ուղեկցությամբ, բուհի ռեկտոր Հովհաննես Հովհաննիսյանի գլխավորությամբ, հոկտեմբերի 12-ին այցելել է սահմանային գոտի՝ տեղում ծանոթանալու սահմանային եւ թիկունքային պահպանության տեղամասերում իրականացվող աշխատանքների ընթացքին։ Համալսարանի պատվիրակության կազմում են եղել բուհի պրոռեկտորները, ֆակուլտետների դեկանները, ինչպես նաեւ դասախոսական կազմի ներկայացուցիչներ։

Պաշտպանության նախարարը ներկայացրել է կատարված աշխատանքների մանրամասները, այնուհետեւ պատասխանել այցելուներին հետաքրքրող հարցերին։ Նկատենք, որ ոչ բոլոր դեկաններն են Պապիկյանի հետ այցելել զորամաս: Պապիկյանին ուղեկցում էր բոլոր իշխանություններին հավատարմության երդում տված Ժուռնալիստիկայի ֆակուլտետի դեկան Նաղաշ Մարտիրոսյանը, Պապիկյանի կողքին էր ԵՊՀ ռեկտոր Հովհաննես Հովհաննիսյանը, նկատեցինք Հայ բանասիրության ֆակուլտետի դեկան Արշալույս Գալստյանին: «Հրապարակը» մի քանի հարց ուղղեց Գալստյանին:

- Նկատեցինք, որ ԵՊՀ հոգաբարձուների խորհրդի նախագահ, պաշտպանության նախարար Սուրեն Պապիկյանի հետ Դուք էլ էիք այցելել սահման: Մի փոքր կմանրամասնե՞ք, թե ինչ այց էր դա, ինչ նպատակով, ինչ տեսաք սահմանին:

- Այցը կազմակերպվել էր պաշտպանության նախարարի հետ պայմանավորված` ԵՊՀ ռեկտորը ներկայացրեց այդպես: Քանի որ պաշտպանության նախարար Սուրեն Պապիկյանը նաեւ ԵՊՀ հոգաբարձուների խորհրդի նախագահն է, ինքն էր կազմակերպել շրջայց դիրքեր: Նոր աշխատանքներ էին տարվում, եւ այդ աշխատանքներին ծանոթանալու, ինչպես նաեւ արդեն իսկ ավարտված աշխատանքներին ծանոթանալու համար: Սա էր հիմնական նպատակը: Մնացած հարցերը կազմակերպել էր ռեկտորի աշխատակազմը:

- Ի՞նչ զորամասեր այցելեցիք: Ո՞ր սահմաններն ուսումնասիրեցիք: Ի՞նչ աշխատանքներ էին իրականացվում:

- Անկեղծ ասած, չեմ կարող ասել, որովհետեւ չգիտեմ` կա՞ նման իրավունք, թե՞ ոչ: Բայց եթե անկեղծ, չգիտեմ էլ….

- Իսկ ո՞ր մարզ էիք այցելել:

- Արարատի մարզում եղանք, հասանք Վայոց Ձորի մարզ:

- Ձեր տպավորությամբ` սահմանին ի՞նչ իրավիճակ է տիրում: Կահավորվա՞ծ էին սահմանային դիրքերը:

- Այն վայրերում, որտեղ մենք ենք եղել, բավականին նորմալ վիճակ էր: Ավելին կդժվարանամ ասել:

- Զինվորների հետ շփվեցի՞ք: Նրանց առօրյան ինչպիսի՞ն էր:

- Զինվորների հետ չենք շփվել: Զորամասից ներս չենք մտել: Նման բան այցի շրջանակներում նախատեսված չի եղել:

- Նկատեցինք, որ որոշ դեկաններ ներկա չէին: Օրինակ, Եվրոպական լեզուների եւ հաղորդակցության ֆակուլտետի դեկանին չնկատեցինք, Աշխարհագրության եւ երկրաբանության ֆակուլտետի, Արեւելագիտության դեկանները նույնպես չկային: Ինչո՞ւ չէին եկել:

- Ինձ անձամբ ռեկտորի աշխատակազմից են տեղեկացրել: Այո, ես էլ նկատեցի, որ որոշները ներկա չէին: Ֆակուլտետներ կային, որ դեկանների փոխարեն ամբիոնի վարիչներ էին եկել:

- Նմանատիպ այցերը շարունակակա՞ն են լինելու:

- Համենայնդեպս, ես կարծում եմ, որ նմանատիպ այցերը պետք է լինեն շարունակական: Մենք նախարարին ասացինք, որ հնարավորության դեպքում կարելի է նման այցերը կազմակերպել պարբերաբար:

- Ինչո՞վ են նմանատիպ այցերը կարեւոր: Ի՞նչ ազդեցություն ունեցավ այն Ձեզ վրա:

- Կարեւոր են, քանի որ այն, ինչ արվում է եւ ներկայացվում է պաշտոնական խողովակներով, այսպես հնարավոր կլինի տեսնել սեփական աչքերով: Բնականաբար, այն, ինչ տեսնում ես քո սեփական աչքերով, շատ ավելին է, քան այն, ինչ ներկայացվում է պաշտոնական խողովակներով: Վերջապես, այն կարող է քեզ մոտ` որպես անհատի, առանձին տպավորություն առաջացնել:

- Ոչ վաղ անցյալում` 2021-ին, 5165 շարժման անդամ էիք Դուք, հավանաբար, ընդդիմադիր հայացքներ ունեիք: Այժմ ինչ-որ բան փոխվե՞լ է Ձեր քաղաքական հայացքներում, թեպետ այդ շարժումն այլեւս, որպես այդպիսին, ակտիվություն չի ցուցաբերում, սակայն հետաքրքիր է` շփվո՞ւմ եք շարժման անդամների հետ:

- Ես, անկեղծ ասած, չգիտեմ էլ՝ կա՞ 5165 շարժումը, թե՞ ոչ: Այդ շարժման հետ իմ համախմբումը ժամանակին եղել է իմ մտերմությունը «Հայ ասպետ»-ի, Կարին Տոնոյանի անձով պայմանավորված: Ի դեպ, այդ շրջանում, շարժումը նախատեսված չէր քաղաքական գործողությունների համար: Մի պահ եղավ այդպես, դրանից հետո ես առնչություն չեմ ունեցել շարժման հետ: Նորից կկրկնեմ․ իմ մասնակցությունը եղել է միջնորդավորված` Կարին Տոնոյանի միջոցով:

- Բայց շարժումը միշտ էլ քաղաքական է եղել, ի դեպ` ընդդիմադիր շարժում էր: Ընտրություններին էլ ներկայացան որպես ընդդիմադիր ուժ:

- Հիմա էլ, դրանից հետո էլ ես որեւէ կերպ մասնակցություն չեմ ունեցել պրոցեսներին: Իմ անձնական դիրքորոշումն ունեցել եմ միշտ, բայց խմբերի մեջ, կառույցներով դրանց մասին չեմ խոսում: