Ուկրաինան չպետք է մնա մեն-մենակ. Զելենսկին կոչով դիմել է Թրամփին
Ուկրաինայի նախագահ Վլադիմիր Զելենսկին ԱՄՆ նախագահ Դոնալդ Թրամփին կոչ է արել խիստ պատժամիջոցներ սահմանել Ռուսաստանի դեմ և Ուկրաինային տրամադրել լրացուցիչ հրթիռներ Patriot ՀՕՊ համակարգերի համար՝ էներգետիկ ենթակառուցվածքներին հասցված զանգվածային հարվածից հետո:
Զելենսկու խոսքով՝ գիշերվա ընթացքում ռուսական զորքերը կիրառել են 39 բալիստիկ հրթիռ և 120-ից ավելի հարվածային անօդաչու թռչող սարքեր, Կիևի մարզի և Խարկովի էներգետիկայի ու կրիտիկական ենթակառուցվածքների օբյեկտների դեմ:
Նա հայտարարել է, որ հարձակման հետևանքով մոտ 600 հազար մարդ մնացել է առանց էլեկտրականության: Նաև, նրա տվյալներով, վնասվել են էլեկտրաէներգետիկ համալիրի 26 օբյեկտ և նավթագազային ենթակառուցվածքի չորս օբյեկտ: Զելենսկին հայտնել է զոհերի և վիրավորների մասին:
Ուկրաինայի նախագահը Մոսկվային մեղադրել է ապաէսկալացման հնարավորությունը ձախողելու մեջ և Վաշինգտոնին կոչ է արել արձագանքել հարվածին: Նա նաև հղում է արել Ռուսաստանի դեմ պատժամիջոցների մասին օրինագծին, որը կապված է ամերիկացի սենատոր Լինդսի Գրեմի հետ:
«Ամերիկայի նախագահն ունի բոլոր հզոր և բավարար գործիքները, որպեսզի մոտեցնի խաղաղությունը՝ շնորհիվ ուժի, արդարության և ագրեսորի վրա ճնշման», — հայտարարել է Զելենսկին:
Նա ընդգծել է, որ Ուկրաինան չպետք է մնա մեն-մենակ Ռուսաստանի դեմ, և ԱՄՆ-ին, Եվրոպային ու մյուս գործընկերներին կոչ է արել շարունակել Կիևի ռազմական աջակցությունը:
