Փաշինյանը խոստովանեց․ ինքն է Արմեն Սարգսյանին «թոշակի» ուղարկել
- Armen Sukiasyan
- Nov 20, 2022
- 1 min read
Երեկվա ֆեյսբուքյան ասուլիսում Նիկոլ Փաշինյանը, բնականաբար, առաջինն անդրադարձավ նախագահ Արմեն Սարգսյանի հրաժարականի փաստին։ Եթե մի կողմ թողնենք ֆորմալ, դիվանագիտական ձևակերպումները, ապա Փաշինյանը՝ անդրադառնալով Նախագահի թեկնածուի հարցին, ըստ էության, բացահայտել է Արմեն Սարգսյանի հրաժարականի հիմնական պատճառը։ «Պետք է գնանք այնպիսի լուծումների, որ հանրապետության նախագահի, կառավարության և խորհրդարանական մեծամասնության միջև լինի քաղաքական ներդաշնակություն»,- ասել է Փաշինյանը։
Այլ խոսքով, վարչապետն ակնարկում է, որ «քաղաքական ներդաշնակությունը» խախտողը եղել է հենց Արմեն Սարգսյանը ու նրա հրաժարականով, այսպես ասած, թվացյալ «երկիշխանության» բաղադրիչը վերանում է և ստեղծվում է միանգամայն մոնոլիտ իշխանություն ձևավորելու հեռանկար։
Դժվար չէր ենթադրել, որ ղազախական իրադարձություններից հետո Փաշինյանը ստանալու է ներքաղաքական հարթության վրա ավելի անկաշկանդ գործելու քարտ- բլանշ ու պետք է կանխատեսել, որ Արմեն Սարգսյանից բացի՝ առաջիկա շաբաթներին, ամիսներին իշխանության ներսում կլինեն նոր զտումներ՝ իշխանության «կայունությունը» և միակենտրոնությունն ապահովելու նպատակով։ Պատահական չէ, օրինակ, որ երեկվանից նոր թափ ստացան խոսակցությունները՝ գլխավոր դատախազ Արտակ Դավթյանի վաղաժամ պաշտոնանկության մասին։
Ի դեպ, երեկվա ասուլիսի մեկ այլ դրվագում ևս Փաշինյանն անուղղակի խոստովանել է, որ հենց ինքն է Արմեն Սարգսյանին «թոշակի ուղարկողը»։ Վերջինիս հրաժարականից հետո սահմանադրական փոփոխությունները, կարծես թե, կորցրել են ակտուալությունը։ «Ամենևին փաստ չէ, որ ՀՀ-ում սահմանադրական փոփոխություններ տեղի կունենան։ Ներկայումս մենք խնդիր ունենք 4 տարվա գործունեությունից հետո, այսպես ասած, աուդիտի ենթարկել մեր գործող Սահմանադրությունը և տեսնել թե ինչ լավարկման տեղեր և հնարավորություններ կան։ Իմ անձնական համոզմունքն է, որ կառավարման համակարգը չպետք է փոխվի»,- ասել է Փաշինյանը։
Նիկոլ Փաշինյանը լուծել է միակենտրոն իշխանության ձևավորման հարցը, նա համարում է, որ այլևս վերացած են իշխանությանը սպառնացող վտանգները՝ հակամարգի ներսից ու դրանից դուրս, ըստ այդմ՝ սահմանադրական ռեֆորմը նրա համար դարձել է ոչ ակտուալ, ֆորմալ գործընթաց։
Վահրամ Բագրատյան
