Բաքուն հանդես է գալիս նոր սպառնալիքներով եւ պահանջներով. ընդդիմադիր պատգամավոր
- Ani
- Oct 3, 2024
- 1 min read
Ադրբեջանը շարունակում է սպառազինություններ եւ ռազմական տեխնիկա գնել։ Այս մասին Ազգային ժողովում ավանդական ճեպազրույցի ժամանակ հոկտեմբերի 3-ին ասել է ընդդիմադիր պատգամավոր, Հայաստանի Հանրապետական կուսակցության անդամ Տիգրան Աբրահամյանը։
Իրավիճակը Բաքվի պահանջների առումով բավական տագնապալի է։ «Ի տարբերություն 44-օրյա պատերազմին նախորդող շրջանի՝ գնումների մասշտաբների եւ տեսականու մասին տեղեկությունն այժմ շատ առումներով գաղտնի է։ Դա իրավիճակն ավելի անկանխատեսելի է դարձնում։ Մանավանդ եթե հաշվի առնենք, որ Ադրբեջանը պարբերաբար հայտարարում է ռազմական սցենարի պահպանման մասին իր օրակարգում»,- ասել է Աբրահամյանը։
Նրա խոսքով՝ Բաքուն ոչ միայն չի կատարում իր պարտավորությունները, այլեւ հանդես է գալիս նոր սպառնալիքներով եւ պահանջներով Երեւանի հասցեին։ Դրանք պահանջներ են նաեւ Հայաստանի «ապառազմականացման» մասին, ինչն ակտիվորեն պտտվում է եւ աստիճանաբար ամրանում է Բաքվի օրակարգում։ «Որոշակի ինստիտուցիոնալացում է ստանում նաեւ ադրբեջանցիների Հայաստան այսպես կոչված «վերադարձի» նարատիվը։ «Կարծում ենք, որ Բաքուն պերմանենտ ճնշման միջոցով փորձում է այս նարատիվը պարտադրել պաշտոնական Երեւանին»,- նշել է ընդդիմադիրը։
