«8 տարուց ավելի է՝ այստեղի բնակիչ եմ, 4-5 տարի կոյուղագիծը խցանված է»․ քաղաքացին ահազանգում է
- Ani
- Sep 1
- 1 min read
Երևան քաղաքի Քանաքեռ-Զեյթուն վարչական շրջանի բնակիչն ահազանգում է, որ Պարույր Սևակի 7 հասցեում գտնվող կոյուղագիծն արդեն մի քանի տարի է՝ հաճախակի խցանվում է, իսկ պատկան մարմինները ոչինչ չեն անում։
«Երեկ գիշերվանից կոյուղագիծը նորից խցանվել է, առավոտյան ջրի հոսքը շատացել։ Կանգառում մարդիկ դժվարանում են ավտոբուս բարձրանալ ջրի պատճառով։ Պարտաճանաչ բոլոր վճարումներն անում եմ, բայց հակառակ պատասխանը չեմ ստանում, քաղաքապետարանից ուղղորդում են՝ էստեղ դիմի, էնտեղ դիմի։ Որպես մեր իշխանություն, զբաղվե՛ք ձեր գործով»,- NEWS.am-ի հետ զրույցում պատմեց բնակիչը։
Նա արդեն շուրջ 8 տարուց ավելի է՝ բնակվում է Պարույր Սևակի 7 հասցեում, և կոյուղաջրերի խնդիրը առկա է 4-5 տարի. «Այսքան տարվա ընթացքում իսկապե՞ս բյուջե չկա նորոգելու համար։ Երևի խցանումը անընդհատ բացելուց ավելի շատ գումար են ծախսում, քան որ գան և փորձեն խնդիրը հասկանալ։ Մեզ պետք չի խցանումը բացել, դրա փոխարեն խնդրին լուծում պետք է տալ, գարշահոտությունն անտանելի է դարձել»։
NEWS.am-ի գրավոր հարցմանն ի պատասխան «Վեոլիա ջուր» ընկերությունը տեղեկացրել է, որ պատասխանը կտրամադրեն մի քանի օրվա ընթացքում։
