Անցկացվեց «Աստղագիտական շրջահայություններ և մեծ տվյալներ» միջազգային գիտաժողովը

Սեպտեմբերի 15-19-ը ՀՀ Գիտությունների ազգային ակադեմիայում կայացավ «Աստղագիտական շրջահայություններ և մեծ տվյալներ-3» (ASBD-3) միջազգային գիտաժողովը՝ նվիրված Մարգարյանի շրջահայության (FBS) 60-ամյակին և Հայկական վիրտուալ աստղադիտարանի (ArVO) 20-ամյակին, հայտնում են ԳԱԱ տեղեկատվության և հանրային կապերի բաժնից։

Գիտաժողովին մասնակցեցին շուրջ 7 տասնյակ գիտնականներ և հետազոտողներ ԱՄՆ-ից, Գերմանիայից, Իսպանիայից, Իտալիայից, Իրանից, Լյուքսեմբուրգից, Հայաստանից, Մեծ Բրիտանիայից, Նիդերլանդներից, Չինաստանից, Պակիստանից, Ռուսաստանից, Ֆրանսիայից։

Մասնակիցներին ողջունեց ՀՀ ԳԱԱ նախագահ ակադեմիկոս Աշոտ Սաղյանը։ Նա նշեց, որ նման նախաձեռնությունները զարգացնում են միջգիտակարգային համագործակցությունը, նպաստում ոլորտի հետագա զարգացման ուղղությունները և հեռանկարներն ուրվագծելուն, խրախուսում՝ գիտական գործընկերություններ։

ՀՀ ԳԱԱ նախագահն ասաց, որ աստղադիտարանը ճանաչվել է ՀՀ ազգային արժեք 2013 թվականին, Միջազգային աստղագիտական միության տարածաշրջանային աստղագիտական կենտրոն՝ 2015 թվականին և Նշանավոր աստղագիտական ժառանգություն՝ 2021 թվականին։ Այստեղ է գտնվում տարածաշրջանի խոշորագույն աստղադիտակներից մեկը՝ 2․6մ հայելիով աստղադիտակը և աշխարհի խոշորագույն լայնանկյուն և 20-րդ դարի ամենաարդյունավետ աստղադիտակներից մեկը՝ Շմիդտի համակարգի 1մ աստղադիտակը։ 2005 թվականին ստեղծվել է Հայկական վիրտուալ աստղադիտարանը, որն այս ոլորտում Հայաստանը դարձնում է աշխարհի 20 կարևորագույն երկրներից մեկը։

Գիտաժողովի ընթացքում զեկուցումներով հանդես եկան միջազգային ճանաչում ունեցող գիտնականներ։ Քննարկվեցին պատմական ու ժամանակակից աստղագիտական տվյալները, տվյալների թվայնացման ու արխիվացման գործընթացները, մեծ տվյալների կիրառությունը, վիրտուալ աստղադիտարանները, վերլուծական գործիքները և թեմաներ։

ASBD գիտաժողովը Հայաստանում անցկացվում է երրորդ անգամ: Առաջին երկուսն անցկացվել են 2015 և 2020 թվականներին։