ԱԱ․ Մանվել Խնձրցյանը կշարունակի պայքարը բրոնզե մեդալի համար

Մանվել Խնձրցյանը կշարունակի պայքարը աշխարհի առաջնության բրոնզե մեդալի համար: Խնձրցյանին հաղթած օլիմպիական չեմպիոն, աշխարհի կրկնակի չեմպիոն, Եվրոպայի գործող չեմպիոն ռուս Զաուր Ուգուեւը 61 կգ քաշայինների կիսաեզրափակիչում 10:3 հաշվով տպավորիչ հաղթանակ տարավ ամերիկացի Ֆորեստի նկատմամբ եւ դուրս եկավ եզրափակիչ՝ հնարավորություն տալով Հայաստանի ներկայացուցիչին բրոնզե մեդալի համար սփոփիչ գոտեմարտեր անցկացնել:

Մանվել Խնձրցյանը Ուգուեւին պարտվել էր 1/8 եզրափակիչում 0:11 հաշվով:

Եվրոպայի բրոնզե մեդալակիրը մեկնարկել էր որակավորման փուլից, որտեղ 6:1 հաշվով հաղթել էր իտալացի Սիմեն Վինչենցո Պերոդուին:

Քիչ անց կիսաեզրափակիչի գոտեմարտ կանցկացնի աշխարհի առաջնության բրոնզե մեդալակիր, Եվրոպայի չեմպիոն Արման Անդրեասյանը: Եզրափակիչի ուղեգիրը Անդրեասյանը կվիճարկի աշխարհի փոխչեմպիոն, Ասիայի փոխչեմպիոն Ճապոնիայի ներկայացուցիչ Աոյագի Յոսինոսուկեի հետ: