30 ժամ՝ Սևանա լճում. տնտեսագետ Հովհաննես Գաբրիելյանը գինեսի հերթական ռեկորդին է հավակնում
- Ani
- Aug 27
- 1 min read
Տնտեսագետ 38-ամյա Հովհաննես Գաբրիելյանը գինեսի հերթական ռեկորդին է հավակնում։ Առանց հատուկ միջոցների նա կփորձի հաղթահարել Սևանա լճի 74 կմ երկարությամբ տարածքը։ Նա ջրում կգտնվի շուրջ 30 ժամ։
Կազմակերպիչներից Արամ Մանուկյանը նշեց, որ լողի մեկնարկը կտրվի այսօր՝ օգոստոսի 27–ին՝ ժամը 16։00-ին, Կարճաղբյուր համայնքի լողափից, իսկ վերջնակետը կլինի վաղը՝ 18։00-ին «Փիրուզե» լողափի մոտ։
«Առաջին անգամ 2018 թվականին մասնակցել եմ Ռուսաստանի ուլտրամարաթոնին, Սանկտ Պետերբուրգից Կրոնշտադատ եմ լողացել, 25 կմ։ Երբ այդ տարածությունը 7-8 ժամում հաղթահարեցի, միտք ծագեց, որ իմ հայրենքում՝ Սևանում, պիտի հաղթահարեմ այդ նույն փորձությունը, քանի որ մանկուց երազել էի այդ մասին»,- պատմեց Հովհաննես Գաբրիելյանը։
Հովհաննես Գաբրիելյանը նշեց նաև, որ տնտեսագետի նստակյաց աշխատանքը և պասիվ ապրելակերպը վատ էին անդրադառնում նրա առողջության վրա, այդ իսկ պատճառով սկսեց սպորտով՝ լողով զբաղվել։
«Ռուսաստանում սիրողական մրցույթներ հաճախ են անցկացնում, քանի որ շատ են մեծ ու փոքր լճերը։ Այնտեղ ապրելով փորձում եմ բաց չթողնել հնարավորությունը և մասնակցել գոնե 60 %-ին, ինչն էլ ինձ թույլ է տալիս լավ մարզավիճակում գտնվել»,–ասաց նա։
Հովհաննես Գաբրիելյանը նշեց՝ հույս ունի, որ կարող է շատերի համար օրինակ ծառայել։
«Ցանկացած տարիքի մարդ պետք է սպորտով զբաղվի»,–հավելեց նա։
