Այսօրվանից վերսկսվում են Բաքու-Թեհրան չվերթները

Իրանում Ադրբեջանի դեսպան Ալի Ալիզադեն հայտարարել է, որ «Ադրբեջանական ավիաուղիները» (AZAL) այս շաբաթվանից կվերսկսեն Բաքու-Թեհրան-Բաքու երթուղով թռիչքները, հայտնում է Mehr-ը։

Մի քանի տարվա թռիչքների դադարեցումից հետո, Ադրբեջանի նախագահ Իլհամ Ալիևի հրամանով, «Ադրբեջանական ավիաուղիներ»-ը մեկնարկել է իր առաջին ուղիղ չվերթը Բաքու-Թավրիզ-Բաքու երթուղով: Սկզբում այս չվերթները կիրականացվեն շաբաթական երկու անգամ, X սոցիալական ցանցում գրել է Ալիզադեն։

Ավելի վաղ «Ադրբեջանական ավիաուղիները» հայտարարել էին, որ Բաքվի և Թեհրանի միջև կանոնավոր չվերթները կվերսկսվեն 2025 թվականի սեպտեմբերի 1-ից։ Բաքու-Թեհրան-Բաքու երթուղով թռիչքները կիրականացվեն շաբաթական չորս անգամ՝ շաբաթ, երկուշաբթի, հինգշաբթի և ուրբաթ օրերին, ասվում է հաղորդագրությունում։

Իր ցանցի ընդլայնման շրջանակում ավիաընկերությունը 2025 թվականի սեպտեմբերի 3-ից սկսել է նաև ուղիղ չվերթներ իրականացնել նոր՝ Բաքու-Թավրիզ երթուղով։ Բաքու-Թավրիզ և հակառակ ուղղությամբ թռիչքները կիրականացվեն շաբաթական երկու անգամ՝ կիրակի և չորեքշաբթի օրերին։