Իրավիճակը՝ Նուբարաշենի աղբավայրում ու Երևանի ծխի ամպում թաքնված վտանգները

Նուբարաշենի աղբավայրում երեկ գիշեր բռնկված հրդեհը մարելու համար այս պահին մոտ 30 հրշեջ և մեկ տասնյակ համայնքային աշխատող է ներգրավված, օգտագործվել է 210 տոննա ջուր, սակայն թե երբ հնարավոր կլինի վերջնական մարել, հայտնի չէ։ Այս մասին Sputnik Արմենիայի հետ զրույցում ասել է «Երևանի քաղաքային աղբավայր» ՓԲԸ-ի տնօրենի ժամանակավոր պաշտոնակատար Վահե Վարդապետյանը։

«Այս պահին բաց կրակներն ամբողջությամբ հրդեհաշիջված են, ծխացող օջախներ են մնացել, որոնք պետք է կոնսերվացվի հողային աշխատանքներով։ Ծխից վերջնական ազատվելու մասով ոչինչ ասել չեմ կարող։ Եթե ամեն ինչ լավ ընթանա, այլ խոչընդոտներ չառաջանան, կարծում եմ` 2-3 օրում կավարտենք»,–ասաց նա։

Շատերին մտահոգում է, թե Երևանում կուտակված ծխի ամպը ինչ վտանգավոր հետևանքներ ունի էկոլոգիայի համար, և առողջական ինչ խնդիրներ կարող է առաջացնել։ Sputnik Արմենիան այս թեմայով զրուցել է էկոլոգ Քրիստինե Վարդանյանի հետ։

Նրա խոսքով` երևանցին արդեն վարժվել է օդի աղտոտվածությանը և շատ երկար ժամանակ է` չի շնչում այն օդը, որը պահանջում է Առողջապահության համաշխարհային կազմակերպությունը։

«Նուբարաշենի աղբավայրի անվերջ հրդեհները որպես ծանրագույն խնդիր այսօր կախված են Երևանի վրա։ Ամենավտանգավոր այն է, որ այդ հրդեհները հանգցնելը շատ բարդ է։ Հիմա որքան էլ հայտարարեն, որ բաց կրակի օջախներ չկան, միևնույնն է` աղբավայրը շարունակում է այրվել, քանի որ ներքևի շերտերում կրակը շարունակվում է, իսկ մակերեսին նկատվում է միայն ծուխը։ Սա կարող է տևել շատ երկար ժամանակ։ Ցավոք սրտի, վերջին տարիներին Նուբարաշենի աղբավայրի հրդեհները և դրանց հաջորդած ծուխը շատ երկարատև են դարձել և անդրադառնում են բնակչության առողջության վրա»,–ասաց Վարդանյանը։