Մասկը կրկին քննադատել է Թրամփի «մեծ, գեղեցիկ օրինագիծը»՝ նախազգուշացնելով «ռազմավարական վնասի» մասին

Ամերիկացի միլիարդատեր Իլոն Մասկը շաբաթ օրը կրկին խստորեն քննադատել է խոշոր ծախսերի մասին օրինագիծը, որը պետք է ֆինանսավորի ԱՄՆ նախագահ Դոնալդ Թրամփի ծրագրի մեծ մասը։ Նա իր քննադատությունը վերսկսել է՝ պայմանավորված Սենատում հանրապետականների շտապողականությամբ՝ ընդունելու «մեծ, գեղեցիկ օրինագիծ» անվանումը ստացած փաթեթը և հասցնելու Թրամփի սահմանած վերջնաժամկետին՝ հուլիսի 4-ին։

«Սենատի վերջին օրինագիծը կոչնչացնի միլիոնավոր աշխատատեղեր Ամերիկայում և հսկայական ռազմավարական վնաս կհասցնի մեր երկրին։ Այն բացարձակապես խելացնոր և կործանարար է։ Այն զիջումներ է անում անցյալի ոլորտներին և լուրջ վնաս հասցնում ապագայի ոլորտներին»,- գրել է Մասկը X սոցիալական ցանցում։

Միաժամանակ, նա հաստատել է հարցման արդյունքները, որոնց համաձայն՝ «մեծ, գեղեցիկ օրինագիծը» քաղաքականապես ոչ ժողովրդական է իր բյուջետային հետևանքների պատճառով, և այս կարծիքն այս ամիս հաստատել են մի քանի առանձին հարցումներ։

NBC News Decision Desk-ի անցկացրած վերջին հարցմանը մասնակցած հանրապետականների քառասուն տոկոսը հայտարարել է, որ երբ Կոնգրեսը քննարկում է Թրամփի սատարած օրինագիծը, ամենակարևոր հարցը «պետական պարտքի կրճատումն ապահովելն» է։

Ընդհանուր առմամբ, հարցվածների մեծամասնությունը հայտարարել է, որ ամենակարևոր հարցը Medicaid-ի նման ծրագրերի վրա կատարվող ծախսերի ընթացիկ մակարդակի պահպանումն է։ «Հարցումները ցույց են տալիս, որ այս օրինագիծը քաղաքական ինքնասպանություն է Հանրապետական կուսակցության համար»,- նշել է Մասկը։

Միլիարդատերը բազմիցս քննադատել է Թրամփի «մեծ և գեղեցիկ օրինագիծը»՝ առարկելով բյուջեի դեֆիցիտի վրա դրա ակնկալվող ազդեցությանը։ Նա պնդում է, որ օրինագիծը կզրոյացնի այն խնայողությունները, որոնք ձեռք են բերվել Կառավարության աշխատանքի արդյունավետության դեպարտամենտի (DOGE) շնորհիվ, որի ղեկավար Թրամփը նրան նշանակել էր այս տարվա սկզբին։