Թոշակառու կինը ավելի քան 90 000 դոլար է կորցրել խարդախի հետ առցանց սիրավեպի պատճառով
- Ani
- Jul 13
- 2 min read
Ամերիկյան Մոնտանա նահանգի տարեց բնակչուհին ավելի քան 90 000 դոլար է կորցրել առցանց սիրավեպի հետ կապված խարդախության հետևանքով, գրում է Money Wise-ը։
Նա իր պատմությամբ կիսվել է ՀԴԲ-ի կողմից հունիսի 15-ին՝ Տարեցների նկատմամբ դաժան վերաբերմունքի դեմ պայքարի համաշխարհային օրը ստեղծված տեսանյութում՝ հուսալով օգնել մյուսներին նշանները ճանաչել, քանի դեռ ուշ չէ։
2024 թվականին Ռիտան ծանր էր տանում ամուսնալուծությունը և իրեն մեկուսացած էր զգում, երբ համացանցի միջոցով նրա հետ կապ հաստատեցին։ Խարդախի հաղորդագրությունները լցրեցին նրա կյանքի դժվարին շրջանում առաջացած հուզական դատարկությունը, մինչև որ ֆինանսական վնասն ու դավաճանությունն անհնար դարձավ անտեսել։
«Դա տեղի ունեցավ ճիշտ պահին», - պատմել է նա։ «Ես շատ խոցելի էի։ Ինձ համար այդ տեքստերը թմրանյութի պես էին... կարծես դրանց կարիքն ունեի ապրելու համար։ Հիմա ես կարդում եմ այդ տեքստերը, և վատ եմ զգում, որ խաբվեցի»։
2024 թվականին Ռիտան համացանցում ծանոթացել է մի մարդու հետ, որը ներկայացել է որպես հայտնի անձ։
Ըստ նրա, նրանք չէին կարող անձամբ հանդիպել։ Այն ժամանակ դա տարօրինակ չէր թվում։ Հայտնի անձը նույնպես ամուսնալուծված էր, և նրանք զգացմունքային առումով մտերմացել են ընդհանուր դժվարությունների պատճառով։
Կապն ավելի է խորացել, և այդ ժամանակ հայտնի անձը սկսել է բիթքոինով գումար պահանջել։
Երբ Ռիտան հասկացել է, թե ինչ է կատարվում, նա արդեն կորցրել էր գրեթե 90 000 դոլար։
Ռիտան միակը չէ։ Ըստ ԱՄՆ Առևտրի դաշնային հանձնաժողովի (FTC) տվյալների, 2023 թվականին ամերիկացիները ռոմանտիկ հարաբերությունների հետ կապված խարդախությունների պատճառով ընդհանուր առմամբ կորցրել են 1,14 միլիարդ դոլար, ընդ որում, կորուստների մասին հայտնել է ավելի քան 64 000 զոհ։
Համացանցային հանցագործությունների վերաբերյալ բողոքների կենտրոնի (IC3) կողմից պատրաստված՝ խարդախության մասին ՀԴԲ-ի ամենամյա զեկույցում ասվում է, որ 2024 թվականին ստացվել է ռոմանտիկ հարաբերությունների հետ կապված խարդախությունների վերաբերյալ ավելի քան 17 000 հաղորդում, իսկ ընդհանուր վնասը կազմել է 672 միլիոն դոլար։ Ամենախոցելին 60-ից բարձր տարիքի մարդիկ են. միայն ռոմանտիկ հարաբերությունների հետ կապված խարդախություններից նրանք կորցրել են 389 միլիոն դոլար։
