Blood.Երկու դեղամիջոցի համադրությունն օգնել է հաղթահարել արյան ագրեսիվ քաղցկեղը
- Ani
- Aug 5
- 1 min read
Փորձարարական լենզիլումաբ դեղամիջոցի և ստանդարտ ազացիտիդինի համակցումն օգնել է քրոնիկ միելոմոնոցիտար լեյկոզի (ՔՄՄԼ) բուժմանը։ Արյան քաղցկեղի այս ագրեսիվ և հազվադեպ ձևի դեպքում ռեմիսիան նախկինում համարվում էր քիչ հավանական։ Հետազոտության արդյունքները հրապարակվել են Blood ամսագրում։
Ըստ գիտնականների, լենզիլումաբն արգելափակում է հիմնական պրոբորբոքային ազդանշանային ուղին, որը խթանում է պաթոլոգիական բջիջների ավելցուկային ձևավորումը։ Բուժման առաջին ամիսներին 34 հիվանդից 22-ի մոտ նկատվել է չարորակ բջիջների և բորբոքային մարկերների քանակի զգալի նվազում։ Արդյունքը պահպանվել է, իսկ որոշ դեպքերում՝ ժամանակի ընթացքում ուժեղացել։
Տասնհինգ հիվանդ ռեմիսիայի մեջ է մնացել ավելի քան մեկ տարի, երեքը՝ ավելի քան երեք տարի։ Մեկ մասնակից արդեն չորս տարի է՝ շարունակում է նորմալ կյանքը՝ առանց ռեցիդիվի նշանների։ Ըստ հետազոտության ղեկավար, պրոֆեսոր Դեն Թոմասի՝ սա ՔՄՄԼ-ի համար ռեկորդային ցուցանիշ է։
Բացի այդ, սուր միելոիդ լեյկոզով (ՍՄԼ) հիվանդի մոտ, որը չէր ենթարկվում ստանդարտ թերապիայի, լենզիլումաբի ավելացումը թույլ է տվել ոսկրածուծում քաղցկեղային բջիջների մասնաբաժինը 20%-ից հասցնել 7%-ի։ Սա վկայում է մոտեցման հնարավոր արդյունավետության մասին նաև լեյկոզների այլ տեսակների դեպքում։
Թեև փորձարկումը միջանկյալ փուլում է, հետազոտողները արդյունքները որակում են որպես «արտասովոր խոստումնալից»։ Եթե տվյալները հաստատվեն հետագա փուլերում, բորբոքային ազդանշանի նպատակային արգելափակման ռազմավարությունը կարող է փոխել արյան քաղցկեղի ծանր և նախկինում գրեթե անբուժելի ձևերի բուժման սկզբունքները։
