Հալեպի մերձակայքում տեղի ունեցած բախումների հետևանքով հայեր չեն տուժել. Վահե Մահշիկյան
- Ani
- Aug 4
- 1 min read
Սիրիացի քրդերին միավորող «Սիրիայի դեմոկրատական ուժերն» այսօր հայտարարել են Հալեպի մերձակայքում տեղի ունեցած բախումների մասին։ Սիրիացի քրդերն ու կառավարական ուժերը փոխհրաձգության մեջ են ներքաշվել Հալեպի նահանգի Դայր Հաֆիր բնակավայրի մերձակայքում։ NEWS.am–ի հետ զրույցում սիրիահայ, հայ–արաբական միջազգային իրավական խորհրդի քարտուղար Վահե Մահշիկյանն ասաց, որ բախումների հետևանքով հայերի շրջանում տուժածներ չկան։
«Կառավարական ուժերը հրահրում են քրդերի հետ ավելի ծավալուն բախումներ, որովհետև քրդերն ուզում են Սիրիայի տարածքում ինքնիշխանություն ձեռք բերել»,–նշեց Մահշիկյանը։
Նրա խոսքով, բախումների հետևանքով հազարավոր քաղաքացիներ են զոհվել։ Մահշիկյանը նշեց, որ այս պահին իրավիճակը շարունակում է լարված մնալ։
«Ամեն վայրկյան նոր բախումների ենք սպասում»,–հավելեց նա։
Ըստ Մահշիկյանի, Սիրիայում տիրող լարվածությունը հրահրվում է դրսի ուժերի կողմից՝ առաջին հերթին Թուրքիայի կողմից։
Վահե Մահշիկյանի խոսքով, Սիրիայում ձևավորված նոր կառավարության օրոք երկիրը բազում խնդիրների առաջ է կանգնել՝ այդ թվում տնտեսական։
«Անշուշտ, թուրքերի հովանավորությունն են վայելում։ Մենք նրանց դեմ չենք, բայց ուզում ենք գետնի վրա գործ տեսնել։ Հանցագործությունների՝ սպանությունների, գողությունների դեպքերը ավելացել են։ Միայն Դամասկոսում հունավարին 500 հազար դեպք է գրանցվել գողության, հիմա ավելի շատ են դեպքերը։ Մեր տունը նույնիսկ երկու անգամ թալանել են»,–պատմեց նա։
