Ռուսաստանի մթերային խանութներում ապրանքների տեսականին կրճատվել է

Nielsen հետազոտական ​​ընկերությունը գրանցել է, որ հուլիսին Ռուսաստանի մթերային խանութներում սննդամթերքի տեսականին տարեկան կտրվածքով նվազել է 2.3%-ով, իսկ ոչ պարենային ապրանքները՝ 1.8%-ով, հաղորդում է «Կոմերսանտ» թերթը։

Ալկոհոլային խմիչքների տեսականին նվազել է 5.6%-ով, մանկական ապրանքներինը՝ 5.1%-ով, մանկական խնամքի միջոցներինը՝ 8.3%-ով, իսկ դեմքի խնամքի միջոցներինը՝ 7.3%-ով։ Nielsen-ը չի նշել, թե այս ընթացքում որ սննդամթերքի տեսականին է նվազել։

Ընդ որում, առանձին կատեգորիաներում աննշան աճ է նկատվում՝ հիգիենայի համար նախատեսված ապրանքների հատվածում 1%-ով։

Պարբերականի կողմից հարցված վերլուծաբանները տեսականու կրճատումը բացատրել են նրանով, որ առևտրային ցանցերն ավելի քիչ նորույթներ են գնում։ Բացի այդ, նվազեցնում են նաև հենց խանութների մակերեսը, ինչը կապում են ռուսաստանցիների սպառողական սովորությունների փոփոխության հետ։ Խանութները կենտրոնանում են փոքր օբյեկտների զարգացման վրա՝ պատրաստի սննդի բարձր մասնաբաժնով և գործնականում ոչ պարենային ապրանքների բացակայությամբ: Infoline-ի հաշվարկներով՝ մթերային ցանցերի միջին մանրածախ տարածքը նվազել է 0,7%-ով՝ հասնելով 312 քառակուսի մետրի:

«Лента» առևտրային ցանցից «Կոմերսանտին» հայտնել են, որ վերանայում են տեսականին՝ թողնելով միայն առավել պահանջված ապրանքները, իսկ ազատված մակերեսն առաջարկում են վարձակալության համար։ «X5 Group» («Перекресток», «Пятерочка») ցանցից հայտարարել են, որ 2025 թվականի առաջին կիսամյակում խանութների միջին առևտրային մակերեսը նվազել է 0,9%-ով, իսկ տեսականին վերջին երեք տարվա ընթացքում «օպտիմալացվել է» միջինը 15-20%-ով։