Մենք պետք է այնպես գործենք, որ ոչ մի ուժ չկարողանա խաթարել երկու երկրների հարաբերությունները․ Փեզեշքիանը Գրիգորյանին
- Ani
- Aug 30
- 2 min read
Իրանի նախագահ Մասուդ Փեզեշքիանը Հայաստանի անվտանգության խորհրդի քարտուղար Արմեն Գրիգորյանի հետ հանդիպման ժամանակ գոհունակություն է հայտնել իր վերջին այցելության արդյունքներից՝ այն անվանելով հաջողված և արդյունավետ, հաղորդում է Mehr-ը։
«Վկայակոչելով երկու երկրների բարձրաստիճան պաշտոնյաների միջև այցի ընթացքում ձեռք բերված կառուցողական բանակցությունները և դրական պայմանավորվածությունները, նա շեշտեց, որ Կովկասի տարածաշրջանում տեղի ունեցած վերջին իրադարձությունների, հատկապես այս զգայուն գոտում օտարերկրյա ուժերի ներկայության վերաբերյալ Իրանի Իսլամական Հանրապետության մտահոգությունները մեծապես մեղմվել են՝ հաշվի առնելով հայ պաշտոնյաների տված պարզաբանումներն ու հավաստիացումները։
Նախագահը նաև գոհունակություն է հայտնել «Հյուսիս-Հարավ» միջանցքի շինարարության ընթացքի և այդ նախագծի նկատմամբ Հայաստանի հատուկ ուշադրության կապակցությամբ՝ այն անվանելով Եվրասիական միության անդամ պետությունների տնտեսական և նույնիսկ քաղաքական մերձեցման ամրապնդման կարևոր քայլ:
Նա շեշտեց, որ երկկողմ համաձայնագրերի, հատկապեն Իրանի և Հայաստանի միջև տրանսպորտի ոլորտում, իրականացման արագացումը ուղևորության գլխավոր նվաճումներից և հայ ղեկավարների հետ բանակցությունների կարևորագույն իրադարձությունն էր։
Փեզեշքիանը շեշտել է, որ այսօրվա նպատակադրումը կարող է լայն հեռանկարներ բացել երկու երկրների համար։ Նա հավելել է, որ անհրաժեշտ է հետագայում ևս նպաստել իրանցի և հայ գործարարների միջև առևտրի և համատեղ ներդրումների ընդլայնմանը, որպեսզի երկու երկրների միջև տնտեսական փոխանակումները մի քանի անգամ գերազանցեն ներկայիս մակարդակը։
Նրա խոսքով՝ երկու երկրները կարող են դուրս գալ ապրանքափոխանակման շրջանակից և անցնել նորարարական և մրցունակ արտադրանքի համատեղ արտադրության՝ առաջադեմ տեխնոլոգիաների, կենսատեխնոլոգիայի և նանոտեխնոլոգիայի ոլորտներում՝ հիմնվելով գիտնականների և ակադեմիական հաստատությունների ներուժի վրա։
«Մենք պետք է գործենք այնպես, որ ոչ մի օտար տերություն չկարողանա խաթարել երկու երկրների բարեկամական և ռազմավարական հարաբերությունները», - ասել է Իրանի նախագահը։
Արմեն Գրիգորյանն իր հերթին երախտագիտություն է հայտնել երկկողմ հարաբերությունների զարգացման նկատմամբ Իրանի նախագահի ուշադրության համար՝ նման մոտեցումը արժեքավոր համարելով իր երկրի համար։
Նա ընդգծել է, որ նախագահ Փեզեշքիանի՝ Երևան կատարած այցը Հայաստանի կառավարության համար ունեցել է առանձնահատուկ նշանակություն, որի ընթացքում մանրամասնորեն վերանայվել են երկկողմ հարաբերությունների բոլոր ասպեկտները և հստակորեն սահմանվել է ապագա համագործակցության ուղին։
Հայաստանի Անվտանգության խորհրդի քարտուղարը, ընդգծելով իրանա-հայկական հարաբերությունների ռազմավարական բնույթը, հայտարարել է, որ Երևանը պատրաստ է ստորագրել համապարփակ փաստաթուղթ՝ ռազմավարական համագործակցության վերաբերյալ, որը կսահմանի այդ կապերի երկարաժամկետ տեսլականը։ Գրիգորյանը նաև նշել է Հայաստանում իրանական ընկերությունների ակտիվ ներկայությունը և հույս հայտնել, որ իր երկրի ենթակառուցվածքային և շինարարական նախագծերը կավարտվեն նրանց մասնակցությամբ։ Նա հավելել է, որ Հայաստանը պատրաստ էմի քանի անգամ ավելացնել Իրանի Իսլամական Հանրապետության հետ առևտրի ծավալը։
Ավելի վաղ հայ պաշտոնյան հանդիպել և բանակցություններ է վարել Ազգային անվտանգության բարձրագույն խորհրդի քարտուղարի և Իսլամական հեղափոխության առաջնորդի խորհրդական Ալի Լարիջանիի հետ։
Հանդիպման ընթացքում կողմերը քննարկել են Թեհրանի և Երևանի միջև երկկողմ հարաբերությունների վերջին վիճակը, ինչպես նաև տարածաշրջանային ու միջազգային զարգացումները։
