System of a Down-ը իսկապես փորձեց փոխարինել Սերժ Թանկյանին։ Դարոն Մալաքյանը բացատրում է, թե ինչու դա չաշխատեց

Սերժ Թանկյանի հուշագրության հրատարակումից գրեթե մեկ տարի անց, որտեղ նա խոստովանում է, որ System of a Down-ի մնացած անդամներին տվել է իր օրհնությունը նոր երգիչ գտնելու համար, կիթառահար Դարոն Մալաքյանը խոսել է և հաստատել, որ փոխարինողի մասին խոսակցությունը իսկապես քննարկվել և նույնիսկ փորձարկվել է։

Ultimate Guitar-ի On The Record փոդքասթին տված հարցազրույցում Մալաքյանը խոստովանել է, որ երբեք չի հետաքրքրվել նոր առաջատարի գաղափարով։

«Ես դա սկզբից չէի ուզում։ Ինձ համար System of a Down-ը մենք չորսով ենք։ Եթե մեզանից մեկը չկա, դա System of a Down չէ։ Այո, մենք մտածեցինք դրա մասին։ Այո, մենք փորձեցինք։ Բայց արդյո՞ք մենք իսկապես այդ ուղղությամբ գնացինք։ Ոչ»։

Նա հաստատեց, որ խումբը լսումներ է անցել երգչի համար, և նա «լավ էր հնչում», բայց դա պարզապես ճիշտ չէր թվում։ «Մարդիկ կարող են մտածել, որ ես էի կողմ այս փոխարինողին։ Բայց ճշմարտությունն այն է, որ ես ամենաշատն էի դեմ դրան։ Ես չեմ ուզում շրջվել և տեսնել մեկ այլ մարդու։ «Սիստեմը» «Սիստեմ» է, և եթե դա «Սիստեմ» չէ, ես չեմ ուզում լինել նույն անվան տակ ինչ-որ այլ բանի մաս»։

«Սերժի հետ մենք երբեք չենք քննարկել, թե ինչու դա չստացվեց։ Բայց ճշմարտությունն այն է, որ ես էի, ով ասաց. «Ես չեմ ուզում շարունակել սա առանց նրա»»։ Իր ինքնակենսագրականում՝ «Down With the System»-ում, Թանկյանը գրել է, որ դեռևս 2017 թվականին նա առաջարկել է իր գործընկերներին գտնել իրեն փոխարինող, քանի որ կորցրել էր շրջագայությունների հանդեպ հետաքրքրությունը։

Բասիստ Շավո Օդաջյանը այնուհետև Սերժին ասել է, որ պոտենցիալ վոկալիստը «չի կարող մռթմռթալ», ինչը, ենթադրաբար, դարձել է նրան փոխարինելուց հրաժարվելու պատճառը։ Հիմա պարզ է դառնում. խնդիրը, ավելի շուտ, Դարոնի կողմից «System of a Down»-ին մասնակցելուց հրաժարվելն էր առանց նրանց առաջատարի։

Չնայած խումբը գրեթե երկու տասնամյակ նոր ալբոմ չի թողարկել (նրանց վերջին ալբոմը 2005 թվականի Hypnotize-ն էր), նրանք շարունակում են վերամիավորվել ժամանակ առ ժամանակ՝ կենդանի ելույթների համար: Օգոստոսին System of a Down-ը կմեկնի Հյուսիսային Ամերիկայի մինի շրջագայության, որի շրջանակներում երկու համերգ կունենա Նյու Ջերսիում (Korn-ի հետ), Չիկագոյում (Avenged Sevenfold) և Տորոնտոյում (Deftones):