«Իրավունք». «Ասում են՝ հեսա բաներ կասենք, կտեսնեք` ինչ կլինի, բա ասե՛ք, սպասում եք Նիկոլը հրաժարական տա, նո՞ր ասեք»
«Իրավունք» թերթը գրում է. «Համահայկական ճակատ» շարժման առաջնորդ, ՀՀ ՊՆ նախկին նախարար Արշակ Կարապետյանը հայտարարել է նոր քաղաքական ուժ ստեղծելու գործընթացի մասին, որը կոչվելու է «Համահայկական միասնական խորհուրդ»: Այս մասին «Իրավունք»-ը զրուցել է Արաբկիրի նախկին թաղապետ, Ա. Կարապետյանի առաջնորդած «Համահայկական ճակատ» կուսակցության նախկին գլխավոր քարտուղար, այժմ ԱԺ նախկին պատգամավոր Միհրան Պողոսյանի առաջնորդած «Հայոց համազգային միասնություն» կուսակցության անդամ Հովհաննես Շահինյանի հետ:
— Սա նշանակո՞ւմ է, որ «Համահայկական ճակատ» շարժումը եւ համանուն կուսակցությունը ձախողվեց, եւ հիմա նոր քաղաքական պլատֆորմ է ձեւավորում Արշակ Կարապետյանը:
Հակված չեմ այն տեսակետին, որ «Համահայկական ճակատ» շարժումը եւ համանուն կուսակցությունը ձախողվել են, եւ այդ իսկ պատճառով է ձեւավորվում «Համահայկական միասնական խորհուրդը»՝ որպես նոր ուժ: Կարծում եմ՝ «Համահայկական միասնական խորհուրդը» հակառակը՝ իր մեջ ներառելու է քաղաքական կուսակցությունների, հասարակական կազմակերպությունների, ընդդիմադիր շարժումների: Այսինքն՝ այն ավելի մեծ պլատֆորմով է հանդես գալու, եւ որպեսզի կարողանան ներկայանալ հասարակությանը, այն կոչել են «Համահայկական միասնական խորհուրդ»: Այնպես որ, ե՛ւ շարժումը, ե՛ւ կուսակցությունը գրեթե ամենօրյա ռեժիմով աշխատանքներ են տանում, ակցիաներ կազմակերպում, եւ կարելի է ասել ամենաակտիվ գործող ընդդիմադիր ուժերից մեկն է քաղաքական դաշտում: Իհարկե, նաեւ կցանկանամ անպայման նշել, որ թիվ մեկ ընդդիմադիր գործունեություն այսօր կատարում է Վարդան Ղուկասյանը՝ «ԴՕԿ» կուսակցության պատվավոր նախագահը:
— Դուք տեղյա՞կ եք այս նոր ուժի մասին եւ արդյոք մաս կազմելո՞ւ եք դրան: Եվ եթե տեղյակ եք, ինչպե՞ս եք վերաբերվում այս նոր ուժին Միքայել սրբազանի մասնակցությանը, ինչը հետո հերքվեց հենց իր կողմից:
Ես քննարկումներին չեմ մասնակցել եւ այս պահին նաեւ ֆիզիկապես չեմ կարող մասնակցել, քանի որ երկրից բացակայում եմ: Այն քաղաքական ուժը, որը ներկայացնում եմ՝ «Հայոց համազգային միասնությունը», պիտի ասեմ, որ կուսակցությունում քննարկումներ եւս չեն եղել: Այդ իսկ պատճառով գործունեության մասին տեղեկությանը քիչ եմ տիրապետում, բայց այն, որ ներկայիս գործող վարչախմբի հեռացման հարցը օրակարգում թիվ մեկ խնդիրն է, չեմ կասկածում: Կարծում եմ, որ իրենք այդպես են մտածում: Չեմ կարող ասել, թե ինչ էր ասում Սրբազանը, կամ ինչու է հերքել: Ամենից հեշտ բանը դա քննադատելն է, ամենից դժվարը՝ գործ անելը: Կարող եմ ասել, որ գեներալ Արշակ Կարապետյանն այսօր քաղաքական ընդդիմադիր դաշտում ամենաակտիվ գործող ներկայացուցիչներից մեկն է՝ թե՛ իր կատարած հայտարարություններով ու հարցազրույցներով, եւ թե՛ փողոցային ակցիաներով: Այսօր բավական քիչ թվով մարդիկ կան այդքան ակտիվ, ինչպիսին Արշակ Կարապետյանն է: Մի այսպիսի խոսույթ կա, ասում են՝ «հեսա բաներ կասենք, կտեսնեք` ինչ կլինի»: Բա ասե՛ք, սպասում եք Նիկոլը հրաժարական տա, նո՞ր ասեք: Եթե պիտի հիմա էլ չասեք, որ արդեն ուշացած է, ապա ե՞րբ եք պատրաստվում ասել: Եթե կան փաստեր, որոնք կնպաստեն այս իշխանության հեռացմանը, ո՞ւմ համար եք պահել: Ավելի լավ է այդ դեպքում ոչինչ չասել, քան ուղղակի հաթաթաներ տալ:
— Առաջիկայում նախատեսվում է Գյումրիի ՏԻՄ արտահերթ ընտրությունները: Արդյոք Ձեր կուսակցությունը կամ Դուք անձնապես մասնակցություն ունենալո՞ւ եք որեւէ կերպ:
Գյումրիում պետք է մասնակցեն գյումրեցիները, որոնք ունեն ընտրելու եւ ընտրվելու իրավունք: Պիտի ասեմ, որ ընտրություններին մասնակցելու մասին հայտարարած քաղաքական ուժերի մեջ արդեն ունեմ իմ նախապատվությունը: Սակայն, կարծում եմ, որ դեռ վաղ է այդ մասին խոսելը: Թող առաջադրումները լինեն, ավելի կոնկրետ կխոսեմ այդ մասին եւ կասեմ, թե որ ուժին եմ տալու իմ նախապատվությունը: Սակայն առաջին հերթին Գյումրու ընտրությունները պետք է լինի ՔՊ-ի պարտությունը: Ասեմ նաեւ, որ մեր կուսակցությունում Գյումրու ընտրություններին մասնակցելու հարց չի քննարկվել եւ մեր օրակարգում նման հարց չի եղել»:
