Երևանը կրկին կվայելի կրկեսի հրաշքը․ Tashir Arena-ն «Էթերնիա» մեգաշոուով իր դռները կբացի հայաստանյան հանդիսատեսի առաջ
- Ani
- Sep 30
- 3 min read
Միավորել կրկեսը, խորեոգրաֆիան և թատրոնը՝ առանց մեկը մյուսից տարանջատելու. հենց այս սկզբունքին հավատարիմ է ստեղծվել «Էթերնիա» շոուն, որի մեծ պրեմիերան կկայանա հոկտեմբերի 25-ին՝ օր, երբ «Տաշիր Արենա»-ն պաշտոնապես իր դռները կբացի հայաստանյան հանդիսատեսի առաջ: Կրկեսային այս մեգաշոուն համախմբել է հարյուրավոր արտիստների՝ աշխարհի տարբեր երկրներից, այդ թվում՝ Հայաստանից:
Երևանն ու Հայասատնը շատ երկար են սպասել կրկեսին, ուստի այս միջոցառումը հատուկ կարևորություն ունի մեր երկրի համար, սեպտեմբերի 29-ին՝ Tashir Arena-ում կայացած մամուլի ասուլիսին, որին մասնակցում էին «Էթերնիա»-ի հեղինակներն ու այն կյանքի կոչողները, նշեց «Տաշիր Արենա»-ի գլխավոր տնօրեն Հրաչյա Արշակյանը: Նա հավելեց՝ արենան հիմնովին է կառուցվել՝ բոլորովին նոր շենքում՝ նախորդի վթարային լինելու պատճառով:
«Ուսումնասիրություններ իրականացնելուց հետո որոշվեց կառուցել նոր շենք: Հետո եղավ խնդիր՝ այն համալրել տեխնիկայով: Սամվել Կարապետյանի կողմից կար հստակ նպատակ՝ որ շենքը լինի բազմաֆունկցիոնալ: Կարծում եմ՝ բոլոր սպասումներն արդարացված են, քանի որ մեզ հաջողվեց ստանալ շատ բարձր մակարդակի, անվտանգ, նորագույն տեխնոլոգիաներով հագեցած հարթակ, որտեղ կարող են անցկացվել մի շարք միջոցառումներ՝ կրկեսային և համերգային»,-հավելեց նա:
«Տաշիր Արենա»-ի գլխավոր պրոդյուսեր Վյաչիսլավ Կոլցովը վերհիշեց, թե ինչպես է սկսվել արենայի կառուցման գաղափարը. «Մի օր մեզ մոտ եկավ Տաթևիկն (Կարապետյանը.հեղ.) ու ասաց՝ նոր նախագիծ ունենք, պետք է կրկես կառուցենք, որ միջազգային մակարդակի շոու իրականացնենք: Նրանք, ովքեր հետևում են Տաթևիկի էջին, տեսած կլինեն այն հոլովակը, որում նա հարցնում է՝ «Դուք ինչ-որ բան գիտե՞ք կրկեսի մասին»։ Իսկ մենք ոչինչ չգիտեիք: Այդ պահին, իսկապես, գաղափար չունեինք, թե ինչ է իրենից ներկայացնում կրկեսը: Մեր առաջ շատ հետաքրքիր առաջադրանք դրեցինք՝ Երևանում կառուցել լավագույն հարթակը և այն բարձրացնել միջազգային մակարդակի: Հանձնարարված էր այնպես անել, որ այս տարածքում բազմաբնույթ միջոցառումներ հյուրընկալենք՝ ինչպես տարատեսակ շոուներ, այնպես էլ ասուլիսներ, որոնք կանցկացվեն բարձր մակարդակով»-պատմում է նա:
Լավագույնը ստեղծելու համար պետք էր հավաքել լավագույն մասնագետներին, ինչն էլ արվեց: Նախ և առաջ, թիմն իր շուրջ համախմբեց պրոֆեսիոնալների, ովքեր օգնեցին նախագծել դահլիճը: Այնուհետև իրենց առջև դրեցին նոր առաջադրանք՝ գտնել լավագույններից բաղկացած ստեղծագործական կազմ:
«Մոտ մեկ ու կես տարի շփվել ենք տարբեր խմբերի հետ, բայց որոշեցինք կանգ առնել միջազգային փորձառության վրա, որն արդեն գնահատվել է աշխարհի հանդիսատեսի կողմից»,-հավելում է նա:
«Էթերնիա» շոուի ռեժիսոր-բեմադրիչը միջազգային փորձ ու ճանաչում ունեցող Պավել Բրյունն է, որը երկար տարիներ աշխատել է որպես գեղարվեստական ղեկավար և խորեոգրաֆ կանադական Cirque du Soleil ընկերությունում, որտեղ մասնակցել է այնպիսի լեգենդար ներկայացումների ստեղծմանը, ինչպիսիք են Nouvele Expérience-ը, Saltimbanco-ն, Mystère-ն, և Alegría-ն։ Վեց տարի եղել է Cirque du Soleil’s Residential Shows Division ստորաբաժանման համահիմնադիրներից, որը վերահսկում էր Լաս Վեգասում ռեզիդենտ հինգ շոուները՝ Mystère, O, Kà, Zumanity և Love։ Ռեժիսորը նշում է՝ շատ տպավորված է Հայաստանի պատմությամբ ու մշակույթով: Սա նրա առաջին նախագիծը չէ Երևանում․ այստեղ առիթ ունեցել է աշխատելու նաև Սունդուկյանի թատրոնում՝ «Дети Орбата» ներկայացման շուրջ։
«Գիտե՞ք, ինձ համար առաջնահերթը մարդկային կոնտակտն է»,-խոսելով «Տաշիր Արենա»-ի հետ համագործակցության մասին, նշում է նա,-«Այո, ես մեծ նախագծերի շուրջ եմ աշխատել, և մասշտաբով ինձ զարմացնելը դժվար է, բայց երկու տարի առաջ, երբ հանդիպեցի Վյաչիսլավի ու Տաթևիկի հետ, մի բան տեղի ունեցավ. ես տեսա մարդկանց, որոնց հավատացի, իսկ երբ հավատում ես մարդուն, բոլոր տեսակի պայմանագրերը երկրորդական են դառնում: Տեղի ունեցավ մի բան՝ ես հասկացա, որ ինձ համար հետաքրքիր է նրանց երազանքն իրականություն դարձնելը: Մեր երևանյան հանդիպումից հետո վերադարձա Մոսկվա ու կիսվեցի իմ գործընկերների հետ, և այն, ինչ ես էի զգացել այդ զրույցից, փոխանցվեց նաև նրանց: Արդյունքում մենք այստեղ ենք ու հուսով, որ նույնը կփոխանցենք նաև հայ հանդիսատեսին: Մենք հավատում ենք մեր ընդհանուր երազանքին»:
Հայաստանի կրկեսային գործիչների միության նախագահ Սոս Պետրոսյանը կիսվեց իր հիշողություններով: Այս տարածքում նա աշխատել է 1970-ականներից, և այն, ինչ հիմա է տեսնում, «բարի նախանձ է առաջացնում»:
«Պայմաններն այն ժամանակ այն չէին: Ես հիմա, իսկապես, բարի նախանձով եմ տեսնում, թե ինչ պայմաններով են մեր արտիստներն աշխատելու: Ես երկար տարիներ աշխատել եմ և, որպես, տնօրեն, և գլխավոր տնօրեն և գեղարվեստական ղեկավար, և հիմա ուզում եմ շնորհակալություն հայտնել Tashir Group-ին, որ այսպիսի կրկես են կառուցել մեզ համար»,-հավելեց նա։
«Էթերնիա» վերնագիրը փիլիսոփայական գաղափարախոսություն է կրում։ Կրկեսային ներկայացումը բաղկացած է չորս նովելներից, որոնցից յուրաքանչյուրը պատմում է չորս տարերքներից մեկի՝ օդի, ջրի, կրակի և հողի մասին։ Այստեղի հերոսն, ըստ սյուժեի, պետք է անցնի այդ 4 փորձություններով, որոնք միմյանց հետ փոխկապակցված են։
Կրկեսն այն վայրն է, որտեղ միշտ կարելի է հրաշքի ականտես լինել, և այս ներկայացումը բացառություն չէ, ասում է շոուում ընդգրկված արտիստ ՕնոՖրիո Կոլուչին։
«Կրկեսն արվեստի բոլոր ճյուղերի համախմբումն է, և ցանկացած ժանրի պես անցնում է որոշակի զարգացման փուլերով: Կրկեսը միշտ զարմանքի վայր է եղել, որտեղ մարդիկ գալիս են հրաշքի հետևից: Ես ընդունեցի այս հրավերը, որովհետև հասկացա, որ այստեղ գլխավոր նպատակը ապագա կառուցելն է, ինչը հնարավոր չէ առանց անցյալը հիշելու»,-հավելում է նա։
Ներկայացման երաժշտական ձևավորման շուրջ աշխատում է Վալերի Տոլստովը։ Նա ասում է՝ իրեն ոգեշնչել են հայկական հնչյունները՝ հոգևոր, դասական, ջազային ստեղծագործությունները և, իհարկե, մարդիկ, որոնց հետ աշխատում է։
Նախագծի հեղինակները հավելում են՝ «Տաշիր Արենան» կարող է ընդունել մոտ 2000 հանդիսատեսի, կախված պահանջներից այն կարող է ենթարկվել տրանսֆորմացիաների՝ շրջվել, ծալվել, բացվել:
Ասուլիսի շրջանակում լրագրողները դարձան բեմադրությունից փոքրիկ հատվածի առաջին ականատեսները՝ համոզվելով վերը նշվածում։ Իսկ հանդիսատեսը կրկեսի հրաշքը կարող է վայելել հոկտեմբերի 25-ից։
