Չինացի միլիարդատերերը ստեղծում են «սուպերընտանիք». հարյուրավոր երեխաներ՝ ամերիկացի փոխնակ մայրերի միջոցով

Չինացի որոշ միլիարդատերեր օգտագործում են ամերիկացի փոխնակ մայրերին՝ իրենց «անկասելի ընտանեկան դինաստիաները» ընդլայնելու համար՝ նպատակ ունենալով ստեղծել ավելի քան 100 երեխա: Նրանք ասում են, որ նպատակն է պայքարել Չինաստանի ծնելիության նվազման դեմ և ամրապնդել իրենց կլանների ազդեցությունը ապագայում, գրում է Daily Mail-ը։

Չինաստանում փոխնակ մայրության արգելքի պատճառով շատ հարուստ անհատներ իրենց գենետիկական նյութն ուղարկում են արտասահման, ամենից հաճախ՝ Միացյալ Նահանգներ, որտեղ օրենքներն ավելի մեղմ են: Ամերիկացի փոխնակ մոր միջոցով մեկ երեխայի ծննդաբերության արժեքը կարող է հասնել 200,000 դոլարի (մոտավորապես 150,000 ֆունտ ստեռլինգ):

Այս ոլորտի ամենահայտնի ձեռնարկատերերից մեկը Շու Բոն է, ով իր կարողությունը կուտակել է ֆենտեզի տեսախաղեր մշակելով: Նա հրապարակավ հայտարարել է, որ ունի «ավելի քան 100» երեխա: 2023 թվականին Շու Բոն ներկայացավ դատարան, որտեղ նրան զրկեցին չորս չծնված երեխաների ծնողական իրավունքներից, այն բանից հետո, երբ պարզվեց, որ նա արդեն իսկ հայր է եղել կամ գտնվում է ևս ութ երեխա ունենալու գործընթացում: Նա նաև դատարանում հայտարարեց, որ հույս ունի Միացյալ Նահանգներում 20 երեխա ծնել փոխնակ մայրերի միջոցով, որպեսզի նրանք ապագայում կարողանան կառավարել իր բիզնեսը։

Սյու Բոյի նախկին զուգընկերուհի Թանգ Ցզինի հայտարարությունների համաձայն՝ գործարարը առնվազն 300 երեխայի հայր է դարձել։

Մեկ այլ միլիարդատեր՝ Վան Հույվեյը, իբր, վարձել է ամերիկացի մոդելների՝ որպես ձվաբջիջների դոնորներ՝ տասը դուստր ունենալու համար։ Աղբյուրները նշում են, որ նա մտադիր է «ամուսնացնել նրանց ազդեցիկ տղամարդկանց հետ»՝ այդպիսով ստեղծելով ավելի հզոր ընտանեկան դաշինքներ։

IVF USA կլինիկաների ցանցի հիմնադիր Նաթան Չժանը հայտնել է, որ որոշ «գերհարուստ» չինացի հաճախորդներ ձգտում են հարյուրավոր երեխաներ ունենալ ԱՄՆ-ում՝ ոգեշնչվելով Էլոն Մասկից և երազելով «անկասելի ընտանեկան դինաստիայի» մասին։ Նա ասել է, որ մեկ հաճախորդ միաժամանակ խնդրել է ավելի քան 200 երեխա, բայց կլինիկան մերժել է՝ տալով պարզ հարց. ինչպե՞ս է նա դաստիարակելու նրանց։

Որոշ դեպքերում Կալիֆոռնիայի գործակալություններն ու փաստաբանները օգնել են չինացի միլիարդատերերին կազմակերպել տասնյակ երեխաների ծնունդը ԱՄՆ-ում փոխնակ մայրության միջոցով, ինչը հանրային բողոք է առաջացրել։

ԱՄՆ-ում Չինաստանի դեսպանատան ներկայացուցիչն ընդգծել է, որ փոխնակ մայրությունը կարող է հանգեցնել «լուրջ ընտանեկան և սոցիալական էթիկական ճգնաժամի»։