Առաջիկա օրերին ՀՀ իրանական հեղուկ գազ է մտնելու. գինը բարձր է, ուղիղ ասում եմ. եթե մեկ շաբաթից 200 դրամ լինի՝ ֆանստաստիկ լավ կլինի. Գևորգ Պապոյան
- 2 days ago
- 1 min read
Մայիսի սկզբին Հայաստան շատ քիչ քանակով հեղուկ գազ էր մտնում, որի հետևանքով, հիմնականում հեղուկ գազ չկար: Մեր պլան մինիմումն էր Հայաստանում ապահովել հեղուկ գազի ծավալը և այսօր դա արդեն ապահովված է, Հայաստանում կա հեղուկ գազ: Այս մասին «Քաղաքացիական պայմանագիր» կուսակցության քարոզարշավի ժամանակ ասել է Էկոնոմիկայի նախարար Գևորգ Պապոյանը:
Ad
«Գինը 300 պլյուս էր, հիմա, նոր նայում էի, Ապարանում 240 դրամ է: Արդյո՞ք դա այն գինն է, որը պետք է լինի: Ես կարծում եմ, որ ոչ, պետք է իջնի, պրոցեսը դանդաղ գնում է:
Երեկ ինձ Էկոնոմիկայի նախարարության կցորդն Իրանում զեկուցել է, որ Իրանից հեղուկ գազի արտահանման խնդիրը լուծվել է: Դա նշանակում է, որ առաջիկա օրերին Հայաստան է մտնելու նաև իրանական հեղուկ գազ, որը գները կիջեցնի»,-նշել է նա:
Պապոյանը հավելել է, որ այս օրերին, ՌԴ-ից հեղուկ գազն անխափան գալիս է, բայց ՌԴ-ում գների որոշակի աճ է տեղի ունեցել, որը ՀՀ-ում իր ազդեցությունն ունեցել է:
«Ես հուսով եմ, որ իրանական գործոնն իր ազդեցությունը կունենա գների՝ ներքև իջնելու ուղղությամբ: Բարձր գին է, ես ուղիղ ասում եմ և հիմա մենք աշխատում ենք, որ և՛ Իրանից, և՛ ՌԴ-ից մեծ ծավալներով գա, որը պետք է նպաստի գների իջեցմանը:
Ես մայիսի 1-ին էլ եմ ասել՝ այս փուլում, կարճաժամկետում վերադարձը հին գներին, մի քիչ պակաս իրատեսական եմ համարում, շատ պարզ պատճառով, որովհետև ՌԴ-ում գներն ավելացել են և այնտեղ պետական տուրք է դրվել արտահանման վրա, ինձ այդպես են զեկուցել, որը որոշակիորեն ազդեցություն է ունեցել գնի վրա»,-մանրամասնել է Էկոնոմիկայի նախարարը:
Լրագրողի հարցին՝ 200 դրամից չի՞ իջնելու հեղուկ գազի գինը, Պապոյանը պատասխանել է՝ ես հիմա չեմ ուզում գին ասել, բայց եթե մեկ շաբաթ հետո անգամ 200 դրամ լինի, ֆանտաստիկ լավ կլինի:
