Արարատ Միրզոյանը հույս ունի, որ Ադրբեջանում պահվող հայ գերիներն ազատ կարձակվեն
- Ani
- Oct 14
- 1 min read
ՀՀ արտաքին գործերի նախարար արարատ Միրզյանը հույս ունի, որ Ադրբեջանում պահվող հայ գերիներն ազատ կարձակվեն։ Նա այս մասին հայտարարել է այսօր՝ հոկտեմվերի 14–ին, Երևանում ԵԱՀԿ գործող նախագահ, Ֆինլանդիայի արտաքին գործերի նախարար Էլինա Վալտոնենի հետ համատեղ մամուլի ասուլիսում։
Նախարարը նշել է, որ չնայած հաստատված խաղաղությանը և Երևանի ու Բաքվի միջև հարաբերությունների կարգավորման գործընթացին, դեռևս չլուծված խնդիրներ կան, որոնցից առաջինը Ադրբեջանում պահվող գերիների և պատանդների հարցն է (Հայաստանում ադրբեջանցի գերիներ չկան - խմբ.)։
Նախարարի խոսքով՝ աշխատանք է տարվում ամեն օր, որը միշտ չէ, որ տեսանելի է և միշտ չէ, որ արդյունավետ։ «Բայց մենք աշխատում ենք։ Ինչպես միշտ, ուզում եմ հույս հայտնել, որ կլինեն լավ լուրեր։ Մենք շարունակում ենք մեր ջանքերը», - նշել է արտաքին գործերի նախարարը՝ հավելելով, որ երեկ Շարմ էլ Շեյխում քննարկել է այդ հարցը իր ադրբեջանցի գործընկերների հետ։
«Հուսանք, որ այս ջանքերը դրական արդյունքներ կտան», - նշել է նախարարը։ Երբ հարցրել են գերիների մասին տեղեկատվության փոխանցմանը երրորդ երկրների ներգրավման մասին, Միրզոյանը նշել է դրա կարևորությունը, հատկապես հաշվի առնելով Ադրբեջանում ԿԽՄԿ գործունեության դադարեցումը։ «Այս բացը պետք է լրացվի։ Ընդհանուր առմամբ, մեր աշխատանքը չի բացառում երրորդ երկրների հետ շփումները, բայց առաջին հերթին դրանք ադրբեջանական կողմի հետ անմիջական շփումներ են», - հայտարարել է Միրզոյանը։
