«Մոսո, մեքենայի մեջ հոգեպահուստ ի՞նչ ունես․․․»․ ինչպե՞ս է Վազգեն Սարգսյանն արձագանքել, երբ իմացել է՝ սպան տղա է ունեցել

Վազգեն Սարգսյանի հետ Գորիսից Երեւան էինք վերադառնում: Հանկարծ նկատեց, որ ճամփեզրով արագ-արագ քայլում է զինվորական համազգեստ կրող մի մարդ, պատմում է երգիչ Արսեն Գրիգորյանը։

«Զայրացավ.

- Սա զորամասից դուրս ի՞նչ է անում այստեղ:

Մեքենան կանգնեցրեց, դուռը բացեց ու բարկացած շարժվեց դեպի հետիոտնը.

- Սա ի՞նչ բան է: Ի՞նչ ես անում այստեղ:

Զինվորականը հանկարծակիի եկած պատիվ տվեց ու զեկուցեց.

- Պարոն նախարար, դիրքերում էի: Զանգահարեցին, ասացին, որ տղա եմ ունեցել: Թույլտվություն խնդրեցի ծննդատուն գնալու համար․․․

Վազգենը միանգամից վերափոխվեց, պայծառացավ: Գրկեց սպային, շնորհավորեց, հետո դարձավ դեպի իր վարորդը.

- Մոսո, մեքենայի մեջ հոգեպահուստ ի՞նչ ունես, դուրս հանի:

Մեքենայի թափքի վրա դրեցին շիշը, բաժակները, մի քանի խնձոր:

- Դե, աչքդ լույս լինի,- ասաց,- տղայի անունն ի՞նչ ես դնելու:

- Դավիթ:

Բաժակներն իրար խփեցին: Ապա Վազգենը մոտ կանչեց ուղեկցող մեքենայի վարորդին.

- Դավիթի հորը կհասցնես ծննդատուն…», - ֆեյսբուքյան էջում գրել է երգիչը։