Եպիսկոպոսաց ժողովին մասնակցելու համար Հայաստանից Ավստրիա են գնացել Դանիել ու Արարատ Սրբազանները

Հայաստանից Ավստրիայում կայանալիք Եպիսկոպոսաց ժողովին մասնակցելու համար գնացել են Դանիել ու Արարատ Սրբազանները, այս մասին Aysor.am-ին ասաց Մայր Աթոռի տեղեկատվական համակարգի տնօրեն Տեր Եսայի ավագ քահանա Արթենյանը։

Նարեկ Սրբազանը չի մեկնել Ավստրիա, ինչպես նշված է այլ ԶԼՄ-ներում։

Եպիսկոպոսաց ժողովը կմեկնարկի վաղը։

Հիշեցնենք՝ Նիկոլ Փաշինյանը հայտարարել է, թե Հայաստանից դուրս Եպիսկոպոսաց ժողով հրավիրելու նպատակը «կաթողիկոսությունը Հայաստանից դուրս հանելն է»։

«Ես դա թույլ չեմ տալու։ Եթե դրա համար պետք լինի լրացուցիչ միջոցներ ձեռնարկել, կձեռնարկվեն լրացուցիչ միջոցներ։ Մենք դա թույլ չենք տալու»,- սպառնացել էր նա։

Փաշինյանի այս հայտարարությունից մեկ օր անց Դատախազությունը քրեական հետապնդում է հարուցել Ամենայն Հայոց Կաթողիկոս Գարեգին Երկրորդի նկատմամբ։ Արգելվել է Վեհափառ Հայրապետի ելքը Հայաստանից, ինչով փորձ է արվում ձախողել Ավստրիայում կայանալիք եպիսկոպոսաց ժողովը:

Չնայած իշխանությունների բռնաճնշումներին ու հոգևորականների նկատմամբ քրեական հետապնդումներին՝ Վեհափառ Հայրապետն Aysor.am-ին ասել է՝ Եպիսկոպոսոց ժողովը կկայանա։

Սրբազան այն Հայրերը, որոնց նկատմամբ երկրից բացակայելու արգելք է կիրառվել, ժողովին կմասնակցեն հեռավար։

Եպիսկոպոսաց ժողովին մասնակցելու հրավեր է ուղարկվել նաև եկեղեցու դեմ արշավին միացած տիրադավներին, նրանցից, այս պահի դրությամբ, միայն Հովնան Տերտերյանն է հայտարարել իր մասնակցության մասին։

Ամենայն Հայոց Կաթողիկոսի հրավերով՝ Եպիսկոպոսաց ժողովը պետք է տեղի ունենա փետրվարի 16-19-ին՝ Ավստրիայի Սանկտ Փյոլթըն քաղաքում։

Եկեղեցու դեմ արշավ հայտարարած իշխանությունները, սակայն, ուղիներ փնտրեցին, որ եպիսկոպոսներին թույլ չտան մեկնել Հայաստանից։

Մայր Աթոռ Սուրբ Էջմիածնի վեց եպիսկոպոսներ և մեկ քահանա մեղադրյալի կարգավիճակում են հայտնվել. նրանք մեղադրվում են դատական ակտի կատարմանը խոչընդոտելու համար, որով պահանջվում է, որ Արման Սարոյանը վերականգնվի Մասյացոտնի թեմի առաջնորդի պաշտոնում։

Քննչական կոմիտե էին հրավիրվել Մակար, Հովնան, Նաթան, Հայկազուն, Մուշեղ և Վահան Սրբազանները, ինչպես նաև Տեր Մովսեսը։ Նրանց նկատմամբ խափանման միջոց է ընտրվել բացակայելու արգելքը։