Խաղային ոլորտի վերաբերյալ վարչապետի հանձնարարականը մինչ օրս չի կատարվել․ պատգամավոր

Հայաստանի վարչապետ Նիկոլ Փաշինյանը դեռևս 2024 թվականին հանձնարարել էր անել ամեն ինչ, որպեսզի 2025 թվականի հունվարին խաղային ոլորտում օպերատոր լինի, այդ դեպքում ինչո՞ւ մինչ օրս օպերատոր չկա։ Այս մասին փետրվարի 10-ին խորհրդարանի նիստում հայտարարել է Հայաստանում իշխող «Քաղաքացիական պայմանագիր» խմբակցության պատգամավոր Հայկ Սարգսյանը, ով «անբարյացակամ» կարգավիճակում է հայտնվել սեփական թիմում։ Նա հիշեցրել է, որ այս հարցը բարձրացվել էր դեռևս 2022 թվականին։

Պետական եկամուտների կոմիտեի նախագահի տեղակալ Ռաֆայել Գևորգյանը, առաջին ընթերցմամբ ներկայացնելով «Խաղային գործունեության կարգավորման մասին» օրենքում և հարակից օրենքներում փոփոխություններ կատարելու մասին օրինագիծը, պարզաբանել է, որ այն օրենքը, որի մասին հայտարարել է Սարգսյանը, չի մտել ուժի մեջ 2025 թվականի հունվարից, այլ ուժի մեջ կմտնի այն ժամանակ, երբ կընտրվի օպերատորը:

Գևորգյանը պարզաբանել է, որ ներկայացված օրինագծով հստակեցվում է, թե որ դեպքում մրցույթի մասնակիցը կարող է բողոքարկել դրա արդյունքը, որպեսզի դատական գործընթացների միջոցով արհեստական խոչընդոտներ չստեղծվեն գործընթացի համար։

Նա հիշեցրել է, որ դեռևս 2024 թվականին ընդունվել է օրենք, որով ներդրվում է կենտրոնացված մոնիտորինգային համակարգ. այն թույլ է տալիս ապահովել վերահսկողություն և մանրամասնորեն հետևել եկամուտներին ու դրույքաչափերին։ Նա սա համեմատել է խաղային ոլորտի համար հսկիչ-դրամարկղային կտրոնների (ՀԴՄ) համակարգի ներդրման հետ։

«Ստեղծվում է թվային ենթակառուցվածք, որտեղ յուրաքանչյուր դրույքաչափ կֆիքսվի իրական ժամանակում, և Պետական եկամուտների կոմիտեն կստանա համապատասխան տեղեկատվությունը», - նշել է պաշտոնյան: