Եղիշե Մելիքյանը ներկա է եղել «Ինտեր»-«Յուվենտուս» հանդիպմանը

Հայաստանի ազգային հավաքականի գլխավոր մարզիչ Եղիշե Մելիքյանը երեկ ներկա է եղել Իտալիայի Ա Սերիայի 25-րդ տուրի կենտրոնական՝ «Ինտեր»-«Յուվենտուս» հանդիպմանը: Այս մասին հայտնում է ՀՖՖ մամուլի ծառայությունը։

​Միլանի «Ջուզեպպե Մեացցա» մարզադաշտում կայացած դիմակայությունն աչքի է ընկել դրամատիկ ընթացքով և ավարտվել տանտերերի կամային հաղթանակով՝ 3:2 հաշվով:

Հանդիպման հաշիվը բացվել է 17-րդ րոպեին Անդրեա Կամբիասոյի ինքնագոլով, սակայն 9 րոպե անց թուրինցիների պաշտպանն ուղղել է սխալը՝ հավասարեցնելով հաշիվը: Առաջին խաղակեսի վերջնամասում «Յուվենտուսը» մնացել է 10 հոգով. 42-րդ րոպեին երկրորդ դեղին քարտը ստանալով՝ դաշտից հեռացվել է Պիեռ Կալյուլուն:

​Երկրորդ խաղակեսում՝ 76-րդ րոպեին, Ֆրանչեսկո Էսպոզիտոն առաջ է մղել «Ինտերին», սակայն քիչ անց Մանուել Լոկատելին խփել է հյուրերի պատասխան գնդակը։ Հանդիպման ելքը վճռվել է 90-րդ րոպեին՝ Պյոտր Զելինսկու խփած հաղթական գոլով:

​Հայաստանի ազգային հավաքականի նախկին ավագ, «Ինտերի» կիսապաշտպան Հենրիխ Մխիթարյանը հայտավորված է եղել խաղին, սակայն մնացել է պահեստայինների նստարանին։

​Այս հաղթանակից հետո «Ինտերը» վաստակել է 61 միավոր և շարունակում է գլխավորել Ա Սերիայի մրցաշարային աղյուսակը, իսկ «Յուվենտուսը» 46 միավորով նահանջել է 5-րդ հորիզոնական: