«3-4 ոստիկան հարձակվել են, բիրտ ուժ կիրառել, սեռական բնույթի հայոհայքներ հնչեցրել». Փաստաբան Ռոման Երիցյանն ահազանգում է՝ 14 տարեկան արցախցի երեխայի են խոշտանգել
- Ani
- 18 hours ago
- 1 min read
Փաստաբան Ռոման Երիցյանն ահազանգել է, որ 14 տարեկան արցախցի երեխայի են խոշտանգել.
«Շատ զազրելի երևույթ է տեղի ունեցել 14-տարեկան արցախցի երեխայի նկատմամբ։ 14-տարեկան երեխան կասկածվել է ինչ-որ հանցագործության կատարման մեջ (հետագայում պարզվել է, այդ արարքը հանցագործություն չէ)։ Երբ շքամուտքից դուրս գալիս է եղել, 3 - 4 ոստիկաններ հարձակվել են նրա վրա, բիրտ ուժ կիրառելով, սպառնալիքներով, հայոյելով, այդ թվում՝ սեռական բնույթի հայհոյանքներ հնչեցնելով՝ տեղափոխել են ոստիկանության բաժանմունք»։
Ռոման Երիցյանի խոսքով՝ ոստիկանության բաժանմունքում երեխան գտնվել է առանց հոգեբանի, քանի որ վերջինս ժամանել է զգալի ուշացում, իսկ ծնողը տեղի ունեցածի մասին տեղեկացվել է միայն երկու-երեք ժամ անց։ Փաստաբանն ասում է, որ չնայած հետագայում երեխան ազատ է արձակվել, սակայն գտնվում է խիստ լարված վիճակում և ունի հոգեբանական օգնության կարիք։
Ռոման Երիցյանը ներկայացրել է անչափահասների իրավունքների կոպիտ խախտման այլ դեպքեր ևս և հավելել․
«Հորդորում եմ ոստիկանության ծառայողներին և աշխատակիցներին՝ գոնե երեխաների հետ կապված հարցերում ցուցաբերել բարեխիղճ վերաբերմունք։ Եվ խոսքը արցախցի լինել-չլինելու մասին չէ, այլ երեխաների իրավունքների պաշտպանության մասին է»։
