Լուկաշենկո․ Ուկրաինային երջանկություն ոչ ոք չի բերի, բացի սլավոնական պետություններից
- Ani
- Oct 12
- 2 min read
Ուկրաինայի նախագահ Վլադիմիր Զելենսկին պետք է հնարավորինս արագ որոշումներ ընդունի խաղաղ կարգավորման ուղղությամբ՝ պետության վերացման վտանգը կանխելու համար։ Այս մասին Տաջիկստանում ԱՊՀ գագաթնաժողովի շրջանակում ռուսաստանցի լրագրողներին է ասել Բելառուսի նախագահ Ալեքսանդր Լուկաշենկոն, տեղեկացնում է Белта-ն։
Լրագրողները հետաքրքրվել են, թե երբ Ուկրաինայի ղեկավարությունը կհասկանա, որ բանակցությունները պատերազմից լավ են։ Լուկաշենկոն նշել է, որ նախկինում հակված էր մեղադրել եվրոպացի առաջնորդներին, սակայն այժմ, ըստ նրա, պետք է հաշվի առնել նաև Վլադիմիր Զելենսկու դիրքորոշումը։
«Վերջին օրերին բազմաթիվ տեղեկություններ ենք ստանում, որ խնդիրը ոչ թե ԱՄՆ-ն է, որը շատ է ցանկանում առաջընթաց խաղաղ գործընթացում, ոչ թե Ռուսաստանը, որը պատրաստ է առաջ շարժվել, ոչ էլ եվրոպացի առաջնորդները, այլ ավելի շատ՝ Վլադիմիր Ալեքսանդրովիչ Զելենսկին։ Կարծում եմ՝ նա ամեն ինչ հասկանում է», ասել է Լուկաշենկոն։
Միաժամանակ նա ուշադրություն է հրավիրել Զելենսկու դիրքին։ «Ի՞նչ կլինի նրա հետ, եթե նա հանկարծակի այդ քայլերը կատարի, ինչպես ինքն է հասկանում։ Կարծում եմ՝ Վլադիմիր Ալեքսանդրովիչը հակված է, որ իր վրա ուժեղ ճնշում գործադրվի։ Այդ ճնշման ներքո էլ համապատասխան որոշումներ կընդունվեն», նշել է նա։
Բելառուսի նախագահի համոզմամբ, այդ որոշումները պետք է ընդունել շտապ, որպեսզի Ուկրաինան «չվերանա որպես պետություն»։ «Գործել է պետք շտապ։ Ռուսաստանը առաջ է շարժվում ճակատում։ Ես դա պատասխանատվությամբ եմ ասում, քանի որ ամեն օր փաստացի հետևում եմ։ Եվ դա կարող է հանգեցնել Ուկրաինայի՝ որպես պետություն, վերացման», հայտարարել է Լուկաշենկոն։
Բացի այդ, նա հավելել է, որ այս հակամարտությունում Ուկրաինայի արևմտյան հարևաններն ունեն իրենց շահերը։ «Նայեք այս խելահեղ հարևաններին՝ նախևառաջ Ուկրաինայի արևմուտքից։ Արդեն հայտնի ուժերն ու պետությունները իրենց տեսնում են Արևմտյան Ուկրաինայում։ Նրանք արդեն պատրաստ են խլել Ուկրաինայի մի մասը, ինչպես դա եղել է Մեծ Հայրենական պատերազմի նախօրեին։ Նույնպես հասկանում եք, թե ինչի մասին է խոսքը։ Այնտեղ շատ լուրջ խառնաշփոթ է», ասել է նա։
«Կրկին ուզում եմ ասել, որ Ուկրաինայի նախագահը լսի իմ առաջարկները և հասկանա, որ Ուկրաինայի տարածքում իրեն երջանկություն ոչ ոք չի բերի, բացի սլավոնական պետություններից։ Ուստի, պետք է նստել և պայմանավորվել», եզրափակել է Լուկաշենկոն։
