Ճշմարտությունը թահինի մասին. ինչու արժե ավելի հաճախ օգտագործել մերձավորարևելյան այս մթերքը

Թահինը լայնորեն հայտնի է որպես դասական հումուսի հիմնական բաղադրիչ, սակայն սննդաբանները նշում են, որ դրա օգտակարությունը շատ ավելին է, քան պարզապես սոուսների և նախուտեստների մեջ օգտագործելը։

Տապակած և աղացած քնջութի սերմերից պատրաստված այս մածուկը հանրաճանաչ մթերք է շատ երկրներում։ Չնայած բաղադրության պարզությանը՝ այն շատ սննդարար է և պարունակում է բջջանյութ, սպիտակուցներ, օգտակար ճարպեր, վիտամիններ և հանքանյութեր։

Քնջութի սերմերը հարուստ են B խմբի վիտամիններով և օրգանիզմի աշխատանքի համար անհրաժեշտ կարևոր հանքանյութերով։ Հետազոտությունները նաև քնջութի կանոնավոր օգտագործումը կապում են խոլեստերինի ավելի ցածր մակարդակի հետ։

Ըստ սննդաբան Սոֆի Գաստմանի՝ թահինն արժեքավոր է ոչ միայն իր սննդարար հատկություններով, այլև բազմակողմանիությամբ. այն կարելի է օգտագործել ինչպես աղի, այնպես էլ քաղցր ուտեստների մեջ։

Սննդային արժեքը

Թահինը պարունակում է կալցիում, մագնեզիում, երկաթ, ցինկ և պղինձ։ Այս հանքանյութերը նպաստում են ոսկորների առողջությանը, նյութափոխանակությանը, իմունիտետին և օրգանիզմում թթվածնի տեղափոխմանը։ Սերմերը մանրացնելու շնորհիվ շատ սննդանյութեր ավելի հեշտ են յուրացվում։

Մթերքը հարուստ է նաև B խմբի վիտամիններով՝ թիամին, նիացին, ֆոլատ, ռիբոֆլավին և վիտամին B6, որոնք մասնակցում են էներգետիկ փոխանակությանը, նյարդային համակարգի աշխատանքին և բջիջների թարմացմանը։

Ազդեցությունը սրտի և խոլեստերինի վրա

Թահինը բավականին կալորիական է, սակայն դրա մեջ առկա ճարպերի մեծ մասը օգտակար չհագեցած ճարպեր են։ Բաղադրության մեջ կան նաև ֆիտոստերոլներ և լիգնաններ՝ բուսական միացություններ, որոնք կարող են նվազեցնել խոլեստերինի ներծծումը աղիներում։

Որոշ փոքր հետազոտություններ ցույց են տալիս, որ քնջութի ամենօրյա օգտագործումը կարող է նվազեցնել «վատ» խոլեստերինի (LDL) մակարդակը, սակայն տվյալները դեռևս միանշանակ չեն։

Մասնագետները սովորաբար խորհուրդ են տալիս չափավոր օգտագործում՝ օրական մոտ մեկ ճաշի գդալ։

Ինչպե՞ս օգտագործել թահինը

Թահինը լինում է բաց և մուգ գույնի՝ կախված նրանից, թե սերմերը կեղևից մաքրված են, թե ոչ։ Բաց գույնի թահինն ավելի մեղմ համ ունի, մուգը՝ ավելի հագեցած և թեթևակի դառնահամ, սակայն ավելի շատ հակաօքսիդանտներ և հանքանյութեր է պարունակում։

Այն կարելի է ավելացնել աղցանների սոուսներին, խառնել կիտրոնի հյութի և սխտորի հետ, ավելացնել յոգուրտի մեջ կամ օգտագործել որպես լապշայի սոուս։ Փորձագետները նշում են, որ սա «հրաշք-մթերք» չէ, այլ սննդակարգն ավելի օգտակար և համեղ դարձնելու հարմար միջոց։