3 օր է` խուզարկում են Փաշինյանի uպանnւթյան նախապատրաստության պլանավորման մեջ կասկածվող արցախցի Մհեր Միրզոյանի հարազատների բնակարանները. փաստաբան
- 11 hours ago
- 1 min read
Վաղ առավոտյան ահազանգով իմացա, որ արդեն երրորդ օրն է ինչ ինտենսիվ խուզարկություններ են իրականացվում արցախցի Մհեր Միրզոյանի հարազատների և ազգականների կողմից վարձակալված բնակարաններում։ Այս մասին գրել է փաստաբան Ռոման Երիցյանը։
«Քննչական գործողություններն պայմանավորվում են դիմակավորված անձանց մասնակցությամբ Նիկոլ Փաշինյանին ուղղված հայտնի տեսաուղերձի հետ։
Ահազանգած աղջկա խոսքով՝ իրենց բնակարանը խուզարկել են երեք օր առաջ՝ վաղ առավոտյան։ Նրա փոխանցմամբ՝ բնակարանը ամբողջությամբ տակնուվրա են արել, առգրավել բոլորի հեռախոսները, բերման ենթարկել իր մորն ու այլ անձանց և այդ ամենը 9 ամսական ու 2 տարեկան երեխաների ներկայությամբ։
Ընտանիքն ահաբեկված է և փաստացի հայտնվել է մեկուսացման մեջ։ Հեռախոսների առգրավումից հետո կորցրել են կապը հարազատների հետ, չեն կարողանում անգամ երեխաներին բժշկի տանել, ակնհայտորեն գտնվում են դիտումների տակ և անգամ իմ հեռախոսահամարն էլ, իրենց խոսքով, մեծ դժվարությամբ են գտել։
Առավել ուշագրավն այն է, որ Մհեր Միրզոյանին կասկածում են բացառապես արտաքին նմանության, մասնավորապես՝ աչքերի նմանության հիմքով։
Չնայած տեսանյութում խոսող անձի աչքերի գույնը ակնհայտորեն տարբերվում է Մհեր Միրզոյանի աչքերի գույնից և բացի այդ՝ վերջինս արդեն երեք տարուց ավել է բնակվում է ՌԴ-ում, այդուհանդերձ, ինտենսիվ գործողությունները շարունակվում են, իսկ նրա նկատմամբ էլ հայտարարված է հետախուզում»,-գրել է նա։
Հիշեցնենք, որ ՀՀ քննչական կոմիտեն հունիսի 1-ին հայտնել է, որ բացահայտվել է Փաշինյանի սպանության նախապատրաստությունը պլանավորած անձի ինքնությունը։ Ավելի ուշ դատախազությունը տեղեկացրել է, որ դիմակավորված հինգ անձանցից մեկի նկատմամբ հարուցվել է հանրային քրեական հետապնդում, հայտարարվել է հետախուզում։
