Մարդիկ, որոնք ժամանակին տեսակետ են հայտնել, թող բարի լինեն դա մինչև վերջ առաջ տանեն. Դանիելյանը՝ Միքայել Սրբազանի մասին
- Ani
- Sep 27, 2024
- 1 min read
ԱԺ «Հայաստան» խմբակցության պատգամավոր Գառնիկ Դանիելյանը չի գնալու Մյուռոնօրհնության արարողությանը։ Այս մասին նա ասաց այսօր՝ սեպտեմբերի 27-ին, «Եռաբլուր» զինվորական պանթեոնում լրագրողների հետ զրույցում:
«Այն մարդիկ, որոնք եկեղեցու դեմ արշավ են սկսել, որոնք հենց գալու օրվանից ասում են՝ Նոր Հայաստան, նոր հայրապետ», այդ մարդիկ այդտեղ չպետք է լինեն՝ անկախ նրանից ես կգնամ, մեր պատգամավորներից որեւէ մեկը կգնա, թե չի գնա»,-ասաց նա:
Անդրադառնալով Շիրակի թեմի առաջնորդ Միքայել Սրբազանի հայտարարությանը, թե եկեղեցին չի էլ աջակցել սրբազան շարժմանը, Դանիելյանն ասաց. «Այն թեզը, թե եկեղեցին քաղաքականությանը չի խառնվում, ճիշտ չէ: Եթե Եկեղեցին պահանջում է Նիկոլ Փաշինյանի հրաժարականը, դա ի՞նչ է: Դա արդեն քաղաքականության մեջ լինել է նշանակում: Դա նորմալ է: մարդիկ եկել, միացել են, դա աջակցություն է, թե ոչ: Ես կարծում եմ՝ աջակցություն է:
Ամբողջ քաղաքական դաշտը խորը բուժման կարիք ունի: Եթե մենք ասում ենք, որ երկիրը կործանվում է, դրան համապատասխան քայլեր պետք է ձեռնարկվեն: Հաջողության գրավականն էլ հենց դա է, որ ամեն մեկը, ինչ ասում է, դրա տերը լինի»:
Ինչ վերաբերում է Միքայել սրբազանի մեկ այլ հայտարարության, թե իշխանափոխության հնարավորություն այս պահին չկա, ընդդիմադիր պատգամավորն ասաց. «Մենք ասում ենք, որ թուրք-ադրբեջանական շահերը սպասարկող, հակապետական, հակաեկեղեցական իշխանություն է, հետո ասում ենք՝ շանս չկա իշխանափոխությա՞ն: Սա ազգային-ազատագրական պայքար է, որի մեջ բոլորը պետք է իրենց մասնակցություն ունենան»:
Հարցին՝ հիասթափվա՞ծ է Միքայել Սրբազանից, Դանիելյանն արձագանքեց. Բոլոր այն մարդկանց, որոնք ժամանակին տեսակետ, կարծիք են հայտնել, խնդրում եմ՝ բարի լինեն այդ կարծիքն ու տեսակետը մինչեւ վերջ առաջ տանեն»:
