Թրամփն արդեն ընտրել է Վենսին որպես իր հաջորդ. Washington Post
- 10 hours ago
- 1 min read
ԱՄՆ նախագահ Դոնալդ Թրամփը մասնավոր զրույցում արդեն որոշել է, որ փոխնախագահ Ջեյ Դի Վենսը պետք է դառնա Հանրապետական կուսակցությունից նախագահի թեկնածու 2028 թվականի ընտրություններում, հայտնում է Washington Post թերթը՝ հղում անելով աղբյուրներին։
«Ի վերջո, մեզ անհրաժեշտ է լինելու ընտրել Ջեյ Դի Վենսին», - հրատարակությունը մեջբերում է ամերիկացի առաջնորդի խոսքերը, որոնք ասվել են շուրջ երկու շաբաթ առաջ Օվալաձև աշխատասենյակում կայացած փակ հանդիպման ժամանակ։
Թրամփի շրջապատի աղբյուրը ընդգծել է, որ նա մասնավոր զրույցում արդեն որոշել է իր հաջորդը դարձնել հենց Վենսին։ ԱՄՆ նախագահի խորհրդականներից մեկը պատմել է, որ փոխնախագահը մեծ տպավորություն է թողել երկրի ղեկավարի վրա՝ հասնելով Իրանի հետ փոխըմբռնման հուշագրի ստորագրմանը, գլխավորելով խարդախությունների դեմ պայքարի արշավը և հաջողությամբ պատասխանելով ԶԼՄ-ների քննադատությանը։
Թերթի այլ աղբյուրներ նշել են, որ դեռ վստահ չեն, թե ում կաջակցի Թրամփը՝ Վենսի՞ն, թե՞ պետքարտուղար Մարկո Ռուբիոյին։ Նրանց խոսքով՝ ամերիկացի նախագահը հակասական բաներ է ասում տարբեր զրուցակիցների և կարող է փոխել իր կարծիքը։ Նրանք հավելել են, որ Սպիտակ տան ղեկավարը մինչև վերջին պահը հետաձգելու է հավակնորդներից որևէ մեկին հրապարակային աջակցություն հայտնելը, որպեսզի «կաղ բադ չերևա»։
Ռուբիոյին մոտ կանգնած աղբյուրը նշել է, որ նա կրճատել է շփումը մամուլի հետ, որպեսզի չսնուցի իր հետագա ծրագրերի մասին լուրերը։ Վենսը նույնպես դեռ հրապարակային հայտարարություններ չի արել իր ապագայի վերաբերյալ։
Թրամփի խորհրդականը WP-ի հետ զրույցում ընդգծել է, որ նա նախկինի պես կցանկանար տեսնել Վենսին և Ռուբիոյին տանդեմում, սակայն հայտնի չէ, թե արդյոք պետքարտուղարը պատրաստ է առաջադրվել փոխնախագահի պաշտոնում։
Ամերիկացի առաջնորդը նախկինում բազմիցս հայտարարել է, որ Վենսին և Ռուբիոյին համարում է իդեալական թեկնածուներ իր նախագահական ժամկետից հետո երկիրը ղեկավարելու համար, ինչպես նաև վստահություն է հայտնել, որ 2028 թվականի ընտրություններում նրանց տանդեմը կլինի անհաղթահարելի։ Ընդ որում, ԱՄՆ նախագահը չի պարզաբանել, թե որ պաշտոնում է տեսնում նրանցից յուրաքանչյուրին։
