«Հրապարակ». Արամ Հովհաննիսյանի պաշտոնանկությունը կապում են Փաշինյանի ծննդյան օրվա հետ

«Հրապարակ» թերթը գրում է. «ՀՀ ոստիկանապետի պաշտոնից Արամ Հովհաննիսյանի անակնկալ հեռացման մասին երեկ բազմաթիվ վարկածներ էին շրջանառվում։ Շատերի համար շոկային էր՝ ինչո՞ւ է Փաշինյանն ազատել իր նվիրյալ զինվորին, որին նախկինում Արգամիչի Արամ էին ասում, իսկ իշխանափոխությունից հետո՝ «Նիկոլի Արամ»՝ Փաշինյանին հավատարմության համար։ Չնայած ՆԳ նախարար Արփինե Սարգսյանը նախարար դառնալու օրվանից ցանկություն է ունեցել ազատվել համակարգի երկարամյա պաշտոնյայից, սակայն Փաշինյանի հովանավորության շնորհիվ Հովհաննիսյանը մնացել է` չխորշելով անգամ Եռաբլուրում որդեկորույս մայրերին քարշ տալու հրահանգից։

Ըստ համակարգի աղբյուրների, նրան ազատելու հիմքեր վաղուց կային և շատ էին: Մեկն իր որդին էր: Դեռ մի քանի տարի առաջ նա իր տնտեսագետ ավագ որդուն՝ Կառլենին, Մասիսի ՄՌՈՒ-ի պետ էր դարձրել` առանց մասնագիտական կրթության: Հետո մամուլը գրեց, որ նա փողով վարորդական վկայականներ է տալիս, և քրեական վարույթ է հարուցվել: Բայց իշխանական շրջանակներում այս պաշտոնանկությունը կապում են Փաշինյանի ծննդյան օրվա հետ: Իբրև թե ոստիկանապետը հունիսի 1-ին պատշաճ չի կազմակերպել միջպետական մայրուղու Սևանի ճանապարհը «փակելու» գործը:

Հիշեցնենք, որ Փաշինյանի 50-ամյակը նշել են Սևանի կառավարական ամառանոցում: Ասում են, թե շատ է ջանք դրել` շուտ է փակել ճանապարհը, և երբ Փաշինյանն անցել է կորտեժով, սպասող վարորդները տևական ազդանշաններով «ողջունել» են նրան։ Բացի այդ, ողջ Երևանը ողողված էր «Շնորհավոր, քեռի Նիկոլ» և «Չենք վստահում» մակագրությամբ պաստառներով: Մեզ պատմեցին, որ Արամ Հովհաննիսյանը, որը Փաշինյանի տարեդարձի հյուրերից է եղել, առաջիններից է հեռացել, հավանաբար, Փաշինյանը հենց այնտեղ է ասել` դիմումդ գրի։ Նրան կփոխարինի Լոռվա մարզպետ Արամ Ղազարյանը»։