Նավթի գներն աճում են Ռուսաստանի դեմ ԱՄՆ-ի նոր պատժամիջոցների սպառնալիքի ֆոնին

Նավթի գներն ուրբաթ օրն աճել են ԱՄՆ նախագահ Դոնալդ Թրամփի այն հայտարարություններից հետո, որ նա Ռուսաստանի վերաբերյալ «խոշոր» հայտարարություն է պատրաստում։ Սա ուժեղացրել է շուկայի մտավախությունները նավթի համաշխարհային խոշորագույն արտադրողներից մեկի դեմ հնարավոր լրացուցիչ պատժամիջոցների սահմանման վերաբերյալ։ Սակայն գների աճը զսպում են ԱՄՆ սակագնային քաղաքականության և ՕՊԵԿ+ գործարքի շրջանակում սպասվող արդյունահանման ավելացման շուրջ մտավախությունները, հաղորդում է Reuters-ը։

Գրինվիչի ժամանակով 04:08-ի դրությամբ Brent տեսակի նավթի սեպտեմբերյան ֆյուչերսներն աճել են 0,28%-ով՝ հասնելով բարելի դիմաց 68,83 դոլարի։ Ամերիկյան WTI տեսակի նավթը թանկացել է 0,36%-ով՝ հասնելով բարելի դիմաց 66,81 դոլարի։

Շաբաթվա սկզբից Brent-ն աճել է 0,8%-ով, մինչդեռ WTI-ն նվազել է 0,2%-ով։ Հինգշաբթի երկու տեսակներն էլ ավելի քան 2%-ով էժանացել էին սակագնային պատերազմների սրման համաշխարհային տնտեսության և վառելիքի պահանջարկի վրա ազդեցության վերաբերյալ ներդրողների մտավախությունների պատճառով։

«Առավոտյան գները մասամբ հետ են բերել կորուստները նախագահ Թրամփի՝ երկուշաբթի օրը Ռուսաստանի վերաբերյալ «կարևոր հայտարարություն» անելու ծրագրերի մասին խոսքերից հետո։ Շուկան մտավախություն ունի նոր պատժամիջոցներից», - նշել են ING-ի վերլուծաբանները հաճախորդներին ուղղված գրության մեջ։

Վաշինգտոնի և Մոսկվայի միջև հարաբերությունները շարունակում են լարված մնալ. Թրամփը դժգոհություն է հայտնում Ռուսաստանի նախագահ Վլադիմիր Պուտինի դիրքորոշումից՝ Ուկրաինայի հետ խաղաղ բանակցություններում առաջընթացի բացակայության պատճառով։

Գներին լրացուցիչ աջակցություն են ցուցաբերում սեզոնային պահանջարկի վերականգնումը և Կարմիր ծովում նավերի վրա եմենցի հութիների նոր հարձակումները։ Բացի այդ, Սաուդյան Արաբիան օգոստոսին նախատեսում է Չինաստանին մատակարարել շուրջ 51 միլիոն բարել նավթ, ինչը վերջին երկու տարվա ընթացքում ամենախոշոր ծավալն է։

Զսպող գործոն է մնում ՕՊԵԿ+-ի պայմանավորվածությունը՝ օգոստոսից արդյունահանումը օրական 548 հազար բարելով ավելացնելու մասին։ Ըստ ING-ի կանխատեսման, հնարավոր է սեպտեմբերին աճը շարունակվի, բայց հետո դադար կլինի։

«Այս ավելացումները կարող են չորրորդ եռամսյակում համաշխարհային շուկայում զգալի հավելուրդի (պրոֆիցիտի) հանգեցնել և ուժեղացնել գների նվազման վրա ճնշումը», - նշում են վերլուծաբանները։

Հինգշաբթի ՕՊԵԿ-ը հրապարակել է World Oil Outlook-ի թարմացված կանխատեսումը, որում նվազեցրել է 2026-2029 թվականների համար նավթի համաշխարհային պահանջարկի գնահատականները՝ Չինաստանում սպառման դանդաղման ֆոնին։ Ակնկալվում է, որ 2026 թվականին համաշխարհային պահանջարկը կկազմի օրական միջինը 106,3 մլն բարել՝ նախորդ կանխատեսման մեջ նշված 108 մլն բարելի դիմաց։