Արցախյան շարժման «ճակատագրական սխալի» մասին հայտարարություններով Փաշինյանն ուզում է հաճոյանալ Ալիևին. Քոչարյան
- 2 hours ago
- 2 min read
Արցախյան շարժման սկիզբը «ճակատագրական սխալ» համարելու մասին խոսակցություններով Փաշինյանը ցանկանում է հաճոյանալ Ալիևին։ Այս մասին Վարդենիսի բնակիչների հետ «Հայաստան» դաշինքի ներկայացուցիչների հանդիպման ժամանակ հայտարարել է ՀՀ երկրորդ նախագահ, վարչապետի թեկնածու Ռոբերտ Քոչարյանը։
Նայելով դեպի Սոթք և այնուհետև Քարվաճառ տանող ճանապարհին՝ Ռոբերտ Քոչարյանը նկատել է, որ նախկինում այս ճանապարհով շատ էին երթևեկում, իսկ հիմա... 2020 թվականի պատերազմի հետևանքներն ամենաշատն իրենց զգացնել են տվել հենց ձեր և Սյունիքի վրա, բայց ընտրությունների միջոցով իրավիճակը ինչ-որ կերպ փոխելու հնարավորություն կա, հավելել է Քոչարյանը։
«Շատ է խոսվում պատերազմի վտանգի մասին։ Հենց իշխանություններն են առաջինը տարածում այդ սպառնալիքը։ Մենք բոլորս խաղաղության կողմնակից ենք, բայց պատերազմի մասին խոսողները փորձում են վախ սերմանել, համոզել մեզ, որ մենք պատերազմի զոհեր ենք։ Առաջնորդի պարտականությունն է անել ամեն ինչ՝ ժողովրդին պատերազմից հետո առաջացած դեպրեսիայից դուրս բերելու համար։ Բայց հակառակն է տեղի ունենում։ Նրանք փորձում են համոզել մեզ, որ առանց իրենց պատերազմ կլիներ։ Որ Արցախյան շարժումը ճակատագրական սխալ էր։
Ես ծնվել և մեծացել եմ Ղարաբաղում։ Երբ մի ժողովուրդ մի տեղ ապրում է, այդ ժողովուրդը իր ապրելու տեղում հետք է թողնում։ Հետքը դա պատմամշակութային ժառանգությունն է, դա եկեղեցիներն են։ Եվ կարող եմ ասել միանշանակ, որ Ղարաբաղում, բացի մզկիթից Շուշիում որևէ այլ մշակութային ժառանգություն, պատմական ժառանգություն Ադրբեջանը չուներ: Երբ Հայաստանի ղեկավարը ասում է այդպիսի բաներ, դա նշանակում է, որ ուզում է դուր գալ մեկ ուրիշին, ծառայում է ոչ թե հայկական շահերին, այլ ծառայում է Ադրբեջանի շահերին», - հավելել է Քոչարյանը։
Նրա խոսքով՝ ընտրությունը հետևյալն է՝ մենք կընտրենք՝ Հայաստանը, թե՞ «Արևմտյան Ադրբեջանը»։ «Իրենք աչք ունեն այս հողերի վրա, աչք ունեն այս ամեն ինչի վրա և Սևանը անվանում են Գյոյչա: Սա՞ ենք մենք ուզում: Չեմ կարծում, որ մենք սա սրան կողմնակիցն ենք: Հետևաբար պետք է ճիշտ ընտրություն կատարենք: Հետևաբար պետք է հասկանանք, որ նա նաև ձեր ճիշտ ընտրությամբ դուք ոչ միայն կապահովեք ձեր տների, ձեր հայրենիքի անվտանգությունը, այլ հնարավորություն կտաք տնտեսական զարգացման համար։ Սա ամբողջությամբ արտացոլված է մեր նախընտրական ծրագրում, և մենք դրա մասին խոսում ենք նաև հանդիպումների ժամանակ», - հավելել է քաղաքական գործիչը։
