Երգչուհի և ինֆլուենսեր Դելարոսային սպանված են գտել Լոս Անջելեսում

22-ամյա լատինաամերիկացի արտիստն ու սոցիալական ցանցերում հայտնի ինֆլուենսերը սպանվել է շաբաթ օրը վաղ առավոտյան՝ Լոս Անջելեսի Նորթրիջ թաղամասում դարանակալման ոճով հարձակման ժամանակ, հայտնել է ոստիկանությունը։

Ինչպես հաղորդում է Independent-ը, հարձակման զոհը նույնականացվել է որպես Մարիա դե լա Ռոզա, որը հայտնի էր ԴԵԼԱՐՈՍԱ բեմական կեղծանվամբ։ Իշխանությունները հայտնում են, որ նա հարձակումից առաջ նստած է եղել կայանված մեքենայում այլ անձանց հետ։

Վկաները ոստիկաններին պատմել են, որ կասկածյալները մոտեցել են մեքենային, նախքան կրակ բացելը։

Լոս Անջելեսի ոստիկանության տվյալներով՝ ժամը 1:25-ի սահմաններում մի քանի կրակոցներ են արձակվել։ Վիրավոր երգչուհին շտապ տեղափոխվել է տեղի հիվանդանոց, որտեղ նրան մահացած են ճանաչել։

Մեքենայում գտնվող մյուս երկու անձինք վիրավորվել են. նրանց առողջական վիճակի մասին այլ մանրամասներ չեն հրապարակվել։ Դեպքի կապակցությամբ ձերբակալություններ չեն կատարվել, և իշխանությունները չեն բացահայտել դրդապատճառը։